Stamford Bridge-ah football hmuhnawm Chelsea 1-1 Manchester United
Cristiano Ronaldo chu hrem vangin Manchester United squad-ah telh a ni lo a, Portugal captain tel loin Erik ten Hag-a hote leh Chelsea inkhel a hmuhnawm tho. Stamford Bridge-a inkhelah Jorginho penalty hmangin Blues-in hma hruai mah se injury time-ah Casemiro-a'n siphurh a sut.
Inrinni zan inkhelah hian Graham Potter-a hoten point thum hmuh theihna hun ṭha an hloh a, chutihrualin mikhual Man United-in point hmuh an phu. Chelsea leh Man United hian inkhel hmuhnawm an chhawp chhuak a, champion lai Man City elpha turin an ṭha tawk em, tih erawh zawhna a awm thung.
Ronaldo tel lohna
Man United-in Cristiano Ronaldo tel loin Tottenham Hotspur an hneh tawh a, Chelsea lakah pawh Portugal captain tel lohna team inkhel hi a nung hle. Stamford Bridge-a inkhel a ni nachungin Man United-in inkhel an thunun a, chance pawh an insiam hnem.
Chelsea keeper Kepa Arrizabalaga-a'n a hna a tlin a, Spanish keeper hian Marcus Rashford goal khung tur ṭum thum a dang a, a khel ṭha hle. Brazilian forward Antony pawhin chance a nei a, keeper Kepa chiah a hmachhawn hnuah goal zawnah a pet lo - Ajax forward hlui hian a ke chhe lamin a pet.
Blues pawhin Pierre-Emerick Aubameyang hmangin chance nei ve bawk mah se keeper David de Gea tan hna harsa a awm lo a, first half-ah mikhual team an che ṭha zawk.
Penalty leh Casemiro
Second half-ah erawh Chelsea an insiam rem a, corner aṭangin a hlauhawm ṭhin hle. Blues defender Trevoh Chalobah-a'n crossbar a tauh per a, minute 60-naah inhliam vanga Raphael Varane thlak a ngaih avangin Man United tlarhnungin ngai a awh lo.
Erik ten Hag-a'n minute 10 a la awm tihin tlarhnung pui thei turin 6ft 4in-a sang leh tharum ngah Scott McTominay a luhtir. Dutch manager thutlukna hi fing viauin lang mah se Scottish midfielder hi boruak sangah talbuaiin ṭul lo takin substitute Armando Broja chu a kuai thlu.
Referee-in penalty a pe a, Jorginho-a'n minute 87-naah cool takin a pet goal. United ṭantute tan chuan penalty hi a nem deuh ang a, chutihrualin a nem titute pawhin Tominay hi an dem tho ang. Chelsea an chak ngei turah a ngaih theih a, mahse hun pek belh minute linaah Luke Shaw cross chu Casemiro-a'n a tauh goal.
Man United tan siphurh sut bakah lawmna tur a awm a, chu chu Casemiro hi a ni. Real Madrid aṭanga an lak Casemiro hian a danglam bik tih khelmual chhungah a lantir a, goal khung an lawm danah pawh 100% a pe tih a chiang hle.
Rahsford-a'n chance ṭha pahnih, Antony-a'n vawi khat. Inkhel pawimawhah chuan khatiang anga chance ṭha kha chu khung tur a ni. Inkhel kan thunun a, half time tawp dawnah kan tlarhnung buai deuh mah se second half-ah kan insiamṭha. Hun chanve hnu lamah chance kan insiam tam lo a, Chelsea pawhin chance an nei bik lo. Draw hi result awm takah ka ngai, chak loh kha chu kan inkhelh dan thlirin a na dawn. - Erik Ten Hag, Manchester United manager
United khan minute 30 chhung an thunun a, ṭha takin kan chhanglet a ni. Goal kan khung chhan kha chu box chhungah theihtawp kan chhuah a, ven kan harsat a ni. Chak kan phu ka ti bik lo a, point khat ve ve kan hmuh kha a dikin ka hria. - Graham Potter, Chelsea manager
Varane-a mittui a tla
Raphael Varane chuan Manchester United leh Chelsea inkhelh ṭumin Pierre-Emerick Aubameyang a venna lamah a ke a rap sual a, inhliam vangin thlak a ngai. France defender Varane hi thlak nghal a ni a, minute 60-naah Victor Lindelof-a'n a thlak. Khelmual a chhuahsan laiin Varane a mittui a tla a, a tuar zuau vang lam ni loin FIFA World Cup khelh loh a hlauh vang a ni thei ang. Varane dinhmun hi he thu ziah lai hian hriat a la ni lo a, damdawi lam mithiam zawkten an endik hnuah a dinhmun tak a chiang ang. FIFA World Cup ṭan nan ni 27 chiah a awm tawh a ni.
Ronaldo kan tan a hlu - Ten Hag
Manchester United manager Erik Ten Hag-a'n Cristiano Ronaldo aiin team a ngai pawimawh zawk a, khawvel player ṭha bera mi ṭhahnem takin an ngaih hi kawhmawh a bawl avangin Chelsea lakah squad-ah a dah lo.
Inrinni zan khan Ronaldo hi Stamford Bridge-ah a awm ve lo a, a hmalam hun tur pawh a chiang ta lo hle. Man United captain hlui Gary Neville chuan, "Cristiano Ronaldo hian bench-a awm a pawm theih loh avangin kartina a khelh theihna turah a kal a ngai. World Cup a hnai tawh a, inremna an neih vat a ṭul," tiin a ṭhianpa chungchang a sawi.
Ronaldo hian Everton an hneh ṭumin a club career-a a goal 700-na a khung a, Man United pawhin chawimawina hial pe mah se khelmual chhunga a chet dan vangin manager nen an boruak a ṭha lo. Dutch manager hian kum 37 mi Ronaldo hi match zawng zawnga chhawr a tum lo tih a chiang.
Chutihrualin Ten hag chuan, "Goal a khung thei a, kan tan a hlu. Kan mamawh tih a chiang a, hemi chungchang hi chu ka sawi ngun tawh," tiin Chelsea nena an inkhelh zawhah Ronaldo an mamawh thu a sawi zel a, Portugal captain hmalam hun erawh a chian phah chuang lo.