Pakistan ngamtu Kohli a ropui

Nimin tlai khan T20 World Cup-ah India chuan an match hmasa berah an hmelma leh elpui Pakistan an hmachhawn a, Virat Kohli-a'n thilmak thlentirin hnehna hlu bik an chang.

Pakistan hian 159/8 runs an siam a, India hian ball tawp berah 160/6 runs an siam a, wicket liin an chak. Cricket inkhel ropui bik an sawi apiangin Melbourne Cricket Ground-a India-in Pakistan an hneh dan hi an sawi reng tawh ang.

Ṭhumvawr a pawimawh a, team ṭha zawka ngaih India an vanneih zawk avangin vawm hmasak an thlang a, inkhelh hmain an dinhmun a ṭha hret. Men in Blue hian bul an ṭan ṭha - over hnihnaah Arshdeep Singh-a'n ball hmasa berah Pakistan chhuanvawr leh captain Babar Azam a rawn vawm hlum a, over linaah Arshdeep-a'n Rizwan a vawm hlum leh bawk.

Pakistan dinhmun a chhia a, mahse Shan Masood leh Iftikhar Ahmed ten dinhmun ṭha zawkah an rawn dah. Chutihrualin Ravinchandran Ashwin-a'n Shan Masood ball vuak a man hman lo chiahte chu Shaheens vanneihnaah a ngaih theih.

Iftikhar hian 51 runs a siam a, ball 34 lek a hman avangin a hlu hle. India bowler-ten wicket la chhunzawm mah se Shan erawhin thi loin 52 runs a siam. Bowl vawm thiam vanga lar Shaheen Afridi-a'n ball riat leka 16 runs a siam chu a hlu a, Pakistan-in 159/8 runs an siam.

Shaheens target chhawp hi ṭha pangngai ni mah se India batting line up ṭha tak tan harsa turin niin a lang lo. Mahse, Pakistan pacer Naseem Shah leh Haris Rauf hmaah KL Rahul (4), Rohit Sharma (4) leh Suryakumar Yadav (15) te an chesual.

Over rukna a zawh chuan India dinhmun a chhe ta zawk a, chak beisei ngam chi a ni tawh lo. Hun harsaah Virat Kohli a rawn inlar a, India captain hlui hi Pakistan hmachhawn tur bika duan emaw tih mai tur a ni.

Kohli hian insiamrem nan hun mamawh deuh mah se a kut a kal meuh chuan Pakistan bowler-te an buai hle. Over 19-na ball hnuhnung pahnihah Kohli hian six vawi hnih a vaw chhuak a, chak beiseina a rawn awm thar. India tan over tawp berah 16 runs siam a ngai a, boruak a 'hot' hle.

Pakistan-in over tawp ber vawm turin pacer thlan tur an neih tawh loh avangin spinner Haris Rauf an thlang a, Hardik Pandya-a'n vaw sualin a thi. Dinesh Karthik a rawn lut a, kum 37 mi DK hian run khat a rawn siam.

India kutah Kohli an innghat a, ball li lekah 15 runs siam a ngai. Kohli-a'n run hnih chauh a siam avangin ball thumah 13 runs siam a ngai a, six a vaw chhuak. India vanneihna belhchhah turin 'no ball' a nih avangin run khat, ball khat leh free hit an neih belh bawk.

Ball thumah run ruk chauh siam a ngaih avangin India dinhmun a ṭha leh ta zawk a, Rauf-a talbuai - a vawm wide avangin ball thumah run nga chauh siam a ngai ta. India-in run thum dang an siam leh a, ball hnihah run hnih siam a ngai.

India tan DK a rawn ding a, wicket keeper Rizwan-a'n a stump out. Men in Blue-in ball khatah run hnih siam a ngai a, Ravinchandran Aswhwin a rawn ding. Nawaz-a'n a vawm out avangin India dinhmun a ṭha a, ball tawp berah Ashwin-a'n run khat siamin India-in hnehna hlu bik an chang.

A tawpa India chakna run vawtu chu Ashwin a ni a, mahse Men in Blue chakpuitu chu Kohli a ni a, India captain hlui hi a ropui thlawt. Pakistan laka Kohli chet dan ropui tak hi thua sawifiah chi a ni lo a, ball 53-ah 82 runs siamin India a chakpui.

October 22, Inrinni
Group 1: New Zealand, Sri Lanka, England, Afghanistan, Ireland & Australia
New Zealand (200/3) bt Australia (111)
New Zealand 89 runs in an chak
England (113/5) bt Afghanistan (112)
England wicket ngain an chak
October 23, Pathianni
Sri Lanka (133/1) bt Ireland (128/8)
Sri Lanka wicket kuain an chak

Group 2 : Bangladesh, India, Netherlands, Pakistan, South Africa & Zimbabwe
October 23, Pathianni
India (160/6) bt Pakistan (159/8)
India wicket liin an chak
Vawiin Inkhel Tur
Bangladesh 9:30 AM Netherlands
South Africa 1:30 PM Zimbabwe