Chawnpui par a vul zual zel

Honda Mizoram Premeir League Season 9-ah round riat khelh zawh a ni ta a, phase 1 khelh zawha a sang palia awmte pawh an inthlak ta. Chawnpui FC-in Chhinga Veng FC 2-1 in an hneh a, coach Lalsangzuala Hmar-in a club hlui hi a sang pali aṭanga paih chhuakin Chawnpui chu semifinal khel zingah a dah lut. A tawi zawng chuan MPL boruak a 'hot'.

Zirtawpni zan khan RG Stadium-ah football hmuhnawm chhawpchhuah a ni a, Chhinga Vengin Vanlallawmtluanga hmangin an khung hmasa. Chawnpuiin MC Malsawmzuala penalty leh Lallawmsanga goal hmangin an lehthal a, Sanga hote 2-1 in an chak.

Boruak a Hot
Football-ah hian club rivalry a awm a, coach rivalry pawh a awm bawk. Chawnpui coach Sanga hian hlawhtling takin Chhinga Veng a enkawl tawh a, tuna Chhingcows coaching staff Anand Gurung leh Lalremruata te nen an thawk ho tawh ṭhin.

Tunah erawh Sanga a kal hrang tawh a, khelmual chhungah chuan hmelma an ni tawh. Chawnpui hi Chhinga Veng lakah an tlawm tawh avangin chak loh nawn an duh lo a, Sanga enkawl team laka chak loh hi manager Remruata hreh ber a ni ngei ang.

Hei chauh hi a ni lo, Chhingcows forward Lawmtluanga hi MPL ṭantirha Chawnpui tana khel ngei tura ngaih a ni. Amaherawhchu coach Sanga hnuaia khelh aiin Chhingcows tana khelh a thlang.

RG Stadium-a inkhelah Chhinga Vengin bul an ṭan ṭha zawk a, chance pawh an nei hmasa zawk. Minute 29-naah dinglam aṭanga Rorelliana cross ṭha chu Lawmtluanga'n a tauh goal a, Chhinga Vengin an khung hmasa a ni ringawt lo - Chawnpui hnartu Lawmtluanga'n a khung.

LS-a a hmuhnawm
Chawnpui an insiamrem a, tun hnaia harhtharhna chang coach Sanga hote goal bawh a na sawt. Mipui lam thawm a ṭha a, Chawnpui an phur hle. Chhinga Veng tlarhnungah phase 1-a an che ṭhatna chhan Abel Lalruatfela leh Lalbiakhlua te awm loh a lang.

Melbuk forward Lallawmsanga'n box chhungah ball a lalut a, Chhingcows defender Lalremruata'n a titlu - penalty tura ngaih ni mah se referee-in penalty a pe lo. Chawnpui an lungawi lo a, amaherawhchu an goal nawr rah an seng ta tho.

First half injury time-ah Chhingcows defender-ten ball an clear mai theih loh avangin MC Malsawmzuala a inrawlh hman a, Siaha tlangval hi Remruata lakah thiam takin a tlu der. Referee-in pressure a nei tawh a, penalty a pe. MC-a hian kawh zetin a pet a, keeper RS Lallawmzuala'n khawih fuh mah se goal ban a per hnuah a lut.

Second half-ah team pahnih in chak an tum ve ve tih a lang a, Chhinga Vengin box pawn chiahah freekick hmuin, Johny Lalremruata'n goal zawnah a pet lo. Chawnpuiin minute 59-naah goal an khung leh ta zawk a, captain Lalrinchhana Tochhawng vawrh luh chu Chhingcows defender-in tauh chhuak ṭha tawk loin LS-a'n a tauh goal. Inkhel a hmuhnawm zui a, goal erawh a luh belh lo.

Chawnpui par a vul
Chawnpuiin Khawzawla Chanmari an hneh hnuah RG Stadium-ah Electric Veng leh Chhinga Veng te an hneh. Coach Sanga hian match hnuhnung pathumah a club hluite a zawn zatin a hneh. Khawzawl zin hma hian Chawnpuiin Chhinga Veng an hneh lo a, hemi hnu hian match thum an chak zawn avangin point 13 hmuin table-ah pathumnaah an awm.

Chhingcows erawh an vawi khat chak lohna chauh ni mah se ṭum nga zet an khingpuite an draw avangin panganaah an awm. Chutihrualin MPL table thlir chuan Aizawl FC hnuaiah FC Venghnuai, Chawnpui, Mizoram Police leh Chhinga Veng te an awm a, pahnihna aṭanga panganate inthlauhna point khat diat diat a ni.

Hemi a nih avang hian MPL round 9 a pawimawh dawn a, October 25-26 hian khelh a ni ang. Chawnpui hian table mawngphaha awm Electric Veng an hmachhawn dawn a, Chhinga Vengin relegation zone-a awm FC Bethlehem an hmachhawn dawn. Inkhel tur hi a pawimawh hle.