City an insiamṭha nghal

Liverpool laka 1-0 a an tlawm hnuah Manchester City an insiamṭha nghal a, Inrinni zan khan an mikhual Brighton & Hove Albion chu 3-1 in an hneh.

Anfield-a 'reh' tak Erling Haaland pawh hmuh tur a awm leh ta a, City striker ṭha bik hian goal hnih a khung - minute 22-naah goal hmahruai a khung a, minute 43-naah Bernardo Silva hlawhchhuah penalty chu goal-ah a chantir bawk.

Minute 53-naah Brighton tan Leandro Trossard chuan goal khung ve lehin mikhual team tan beiseina a siam a, mahse, team pahnih 'quality' a inthlau hret.

Hun tawp nan minute 15 chiah a awm tawh tihin Kevin de Bruyne chuan player ṭha bik a ni tih a pholang a, Silva siamsak chu yard 25 vela hla aṭangin mawi zetin a khung.

City hi Premier League-ah home match 10 chu a zawnin an chak ta a, match tinah goal thum aia tlem lo an khung ziah - Aston Villa (1930 & 31) hnua hetiang ti leh thei hmasa ber an ni.

Striker chhuanvawr Haaland pawhin league match 11 aṭangin goal 17 a khung ta der a, an khelmuala an league match hnuhnung pangaah goal 12 a khung!

City hian Thawhlehni zan dar 12:30-ah Champions League khel turin Borussia Dortmund an lenchilh zui ang.