Real an chak leh ta

Spanish La Liga-a league match 11 an khelh tawhah Real Madrid an la tlawm lo - Inrinni zan khan an mikhual Sevilla chu 3-1 in an hneh a, Spanish top flight league-ah hmahruaitu an nih chhunzawm zel.

Real tana Luka Modric goal hmahruai khung chu Sevilla forward Erik Lamela chuan sut mah se, Real tan Lucas Vazquez leh Fede Valverde ten an khung ve leh a, 3-1 in an chak daih.

Barcelona-in nizan khan Athletic Bilbao an lenchilh a, result kan hre hman lo - hnehna chang pawh ni se Real hi point thumin an la thlau dawn tho a ni.

A goal hma
Santiago Bernabeu-ah goal hmu turin nghah rei a ngai lo. Modric chuan minute ngana lekah Vinícius Júnior-a siamsak chu awlsam takin a khung a, "Goal engzat tak khung ang maw?" tiin rilruin zawhna a siam hman.

Mahse, Real tan David Alaba chuan uiawm takin freekick a chhuih lut lo a, first half chhungin goal dang an khung lo - second half ṭan aṭanga minute kuanaah Lamela chuan si phurh sutna goal a rawn khung zui a, Real an hawihai.

Mahse, coach tawnhriat nei ṭha Carlo Ancelotti-a'n minute 77-naah player pathum Dani Carvajal, Ferland Mendy leh Modric a la chhuak a, Vazquez, Marco Asensio leh Antonio Rudiger a luhtir a, a chesual lo.

A hun têah...
Vazquez-a'n khelmualah minute hnih bak hun a hmang hman lo - amah ang thoa bench aṭanga lut Asensio chuan mawi zetin Vinícius tan a siamsak a, Brazilian forward hian keeper chauh hmachhawn mah se a pet lo.

Kum 22 mi forward hian a bula tlan mek Vazquez tan a siamsak zui a, Spanish wing back tan goal khung harsa a ni tawh lo - minute hnih chiah a liam hman, minute 81-naah Asensio chuan Valverde tan a siamsak leh a, Uruguayan midfielder hian kawh zetin goal-ah a chantir.

Real Madrid tan hliam vangin Karim Benzema inlan lo mah se point thum an hlawh chhuak tho a, Sevilla erawh coach thar Jorge Sampaoli hnuaia an tlawm vawi khatna a ni - mahse, inelna hrang hranga match nga an khelhah vawi khat chiah an la chak a, vawi thum an draw.