Lianzuala'n goal nen a match 100-na a lawm

Mizo tlangval Lallianzuala Chhangte chuan Indian Super League-ah match 100 a khel tling ta a, ISL-a a match 100-na a khelh zanah goal a khung bawk.

Lunglei tlangval hian Mumbai City tan goal a khung a, mahse, Jamshedpur FC lakah a team hnehna a chanpui zo lo a, 1-1 in an inhnehtawk.

Inrinni zan inkhel dangah Hyderabad chuan 1-0 in Bengaluru FC an hneh a, Zirtawpni zan inkhelah FC Goa chuan 2-0 in Chennaiyin FC an hneh bawk.

Mizo tlangval
Lianzuala'n Durand Cup-ah goal sarih khungin top scorer a ni a, beiseina sang tak nen ISL season bul a ṭan. Mahse, ISL-a an match hmasa pahnihah khel ṭha tak chungin Lianzuala'n goal a khung lo a, a vanduai.

Jamshedpur nen an intawn hmain Lianzuala'n, "Goal khung ngei tur ka ni a, a lehpekah chuan a fuh tawh ang," tiin Vanglaini a hrilh a, 'Mizo Flash' hming lem an pek Lianzuala hian a thutiam hlen turin hun a mamawh rei lo.

Minute riatna lekah Greg Stewart-a ball siamsak chu Lianzuala hian a tlawh goal a, tun season ISL-a a goal hmasa ber a ni - mahse, minute li hnu lawkah Daniel Chukwu chuan JFC tan si phurh a sut a, hun tawp thlengin goal dang a lut lo.

A hming Lianzuala
Lianzuala'n goal a khung zanah Mumbai tan Lalengmawia Ralte (Apuia) a inlan bawk a, JFC lamah Laldinliana Renthlei leh Ricky Lallawmawma ten inkhel bul an ṭan a, bench aṭangin defender Laldinpuia Pachuau a lut bawk.

DSK Shivajians aṭanga a professional career ṭantu Lianzuala'n ISL-ah match 100 a khel tling ta a, goal 21 khungin assist vawi ruk a nei tawh - NorthEast United aṭanga a ISL zinkawng zawh ṭanin, Delhi Dynamos, Chennaiyin leh Mumbai tan a khel tawh.

Lianzuala hian ISL-ah Chennaiyin tan khel hnem berin, match 53-ah goal 12 a khungsak a, 2019-20 season kha mimal anga season a hman ṭhat ber niin, match 21-ah goal sarih a khung thei a ni.

Sulhnu ropui
ISL-a khelh châk tam tak an awm laiin Lianzuala'n match 100 a khel thei a, India tan vawi 16 inlana goal li khungtu forward chuan, "ISL bul ka ṭan dan ngaihtuah chuan heti zat match khelh hi beisei ngam chi a ni lo.

"Mahse, ka rilruah chuan ka tan hun ṭha la inher chhuak tura ngaihna tlat kha a awm ve a, hei leh chen ka thleng thei hi Pathian hruaina a ni," tiin Vanglaini a hrilh - Lianzuala hian ISL-a a club hmasa ber NorthEast tan match khat chiah a khel a, minute 21 chiah khelmualah hun a hmang.

Lianzuala chuan a goal khung chungchang sawi zuiin, "Pathian malsawmna leh thawhrimna rah a ni. Finishing practice kan nei nasa a, a tawpah chuan a lo thleng ve ta nge nge e. Goal tam zawk khung ka tum a, theihtawp ka chhuah zel ang," a ti.

Mizote & ISL
Tun season ISL-ah Mizoram chhuak player 26 ngawt an tel a, season tinin Mizo player chhiar tham fe an la inlan ziah - mahse, ISL-a match 100 meuh khel tling thei erawh pakhat chauh a awm a, a hming chu Lallianzuala Chhangte a ni.

Lianzuala hian match 100 aṭangin goal 21 a khung a, assist vawi ruk a nei - Mizo player zingah match 76-a goal 24 leh assist vawi riat neitu Jeje Lalpekhlua a phak lo a, Indian player zingah Jeje leh match 117-a goal 51 leh assist vawi 10 neitu Sunil Chhetri chiah a phak lo bawk.

Mizo player zingah ISL match 97 khel tawh Jerry Lalrinzuala (1 goal, 6 assists) leh match 84-a goal riat leh assist 16 neitu Jerry Mawihmingthanga ten ISL match 100 khel tling turin hun an mamawh tam tawh lo.

Inkhel dang
Zirtawpni zan khan FC Goa chuan 2-0 in Chennaiyin an hneh a, Goan club tan Redeem Tlang leh Noah Sadaoui ten goal khat ve ve an khung a, ISL match hnihah vawi hnih an chak tawh.

Goa tana keeper Dheeraj Singh chet ṭhat zanah, Mizoram player Ayush Chhetri chu bench aṭanga luhtir a ni a, Inrinni zana Hyderabad-in 1-0 a Bengaluru an hneh zanah Mizo inlan an awm lo.

Hyderabad tan Bartholomew Ogbeche chuan inkhela goal awmchhun a khung a, Chhetri-a'n Bengaluru tan ISL-a a match 100-na khel mah se an tlawm - India captain hi ISL club pakhat tana league match 100 khel thei hmasa ber a ni.