Saitual Dist. Inter Village Tourney Venglai VC an thiam ber

24th October, 2022

Saitual district huam chhunga khua leh khua, veng leh veng inelna Mahindra 4x4 PikUp Saitual District Inter Village Football Tournament 2022 chu khelh zawh a ni a, final inkhel hmuhnawmah Saitual Venglai chuan Ngopa 1-0 a hnehin an champion.

Inrinni khan Saitual Public Playground-ah final khelh niin, goal kan hmu lawk lo. Hun tawp dawnah Saitual Venglai tan Lalhmingmawia chuan penalty aṭangin goal awmchhun a khung a, man of the match atan thlan a ni zui nghal bawk.

Tournament-ah hian team 27 an inlan a, knockout hmanga inelna neih a ni. Champion hian Rs 50,000 dawngin, pahnihna chuan Rs 25,000 an dawng thung. Inelna an neih hmasak zawk pawhin Venglai VC team tho hi an lo champion tawh a ni.

Thlirna Tawi
Champion: Saitual Venglai VC
Runners up: Ngopa VC
Final MoM: Lalhmingmawia, Venglai VC
Fairplay: Saitual Venglai VC
Best Player: Lalruatdika, Saitual Venglai VC
Top Scorer: Suangngaihmuana (5 Goals), Ngopa VC