Ribery-a'n football a chawlhsan

France winger Franck Ribery chuan football a mangṭha ta, tun hnaiah khup hliam vangin a buai reng a, a khelh mekna Serie A club Salernitana nen inremsiamnain a contract an titawp, kum 39 mi a nih tawh avangin a tan chawlh a hun ve tawh bawk.

Ribery hian a vanglai hun chu Bayern Munich tan a hmang. Bavarians tan hian kum 2007-2019 chhung a khel a, match 425 aṭanga goal 124 khungin a ṭhiante khung tur vawi 182 a siamsak bawk a ni.

A chawlh thu sawiin Ribery chuan, "Ball chu a ding ta a, mahse rilru chhungrila football ngainatna erawh a tawp ve lo. Zinkawng ngaihnawm leh hlimawm min ṭawmpuitute zawng zawng chungah ka lawm," tiin twitter lamah a tarlang.

Allianz Arena-ah khan hlawhtlinna tam tak a chang, a bik takin Dutch winger Arjen Robben nen tlarhma lama an awm khan club dang tana hmachhawn chakawm lo leh huphurhawm tak an ni.

Bayern Munich tan Bundesliga title ringawt pawh vawi kua a chawi a, 2013 khan Champions League nomawi a lakpui bawk. A vanglai hun a liam hnuah Italy a pan - Fiorentina leh Salernitana tan a khel.

An ram France tan match 81 a khel a, goal 16 khungin assist vawi 25 a nei thung. World Cup 2006 khan final an thleng a, mahse Italy an ngam lo. World Cup 2014 kha hnungzâng na vangin a khel thei lo a, ram tana inkhelh a lo chawlhsan zui tawh bawk a ni.