Malaysia-ah Bagnaia a chak ber

Bike intlansiakna sang ber Malaysian MotoGP chu nimin chawhnu lam khan tlan a ni a, rider championship-a hmahruai mektu Francesco Bagnaia chuan hnehna changin a dinhmun a siamṭha ta hle.

Champion tum, hun rei tak chhung championship hmahruaitu pawh ni thei Fabio Quartararo a la che fuh thei lo. Yamaha rider hi pathumnaah a thleng a, champion nomawi humhim tur chuan vanneihna a mamawh tel tawh dawn.

Bagnaina leh Fabio Quartararo te inkarah point 23 a awm ta. Intlansiak hmabak pakhat chiah an nei tawh a, pakhatna tan point 25 hmuh belh theih a la ni. Tun season khar nan November 6, Pathianni hian Valencian GP an tlan ang.

Ducati rider Bagnaia hian intlansiak hmain, "A ṭha thei ang bera tlan a ngai, tihsual neih a remchang lo ang," tiin a sawi lawk a, a tirah pakuana aṭangin bul ṭan mah se hma a sawn nghal duai a, tawlh thluk leh tihsual nasa nei loin a chak thei.

Bagnaia elpui ber Quartararo pawh qualifying lamah a che ṭha lo, 12-na aṭangin a tlan chhuak phak chauh. Ani pawh hian nasa takin hma sawn mah se hnehna chan meuh chu a harsa a, atan podium lawn phak hrim hrim pawh thil lawmawm a ni ang.