Liverpool an tlawm; Klopp a hnual

Manchester City leh West Ham laka hnehna an chan hnuah Liverpool an tlawm leh ta a, table mawngphah luahtu Nottingham Forest chu khualmualah 1-0 in an ngam lo.

Liverpool rilru natna tizual turin inkhela goal awmchhun khungtu Taiwo Awoniyi chu Liverpool duh loh hnu a ni a, season ruk chhunga Reds tana inlan miah lo striker hian minute 55-naah goal a khung.

Reds coach Jurgen Klopp chuan, "Hetiang em em hian ka la hnual ngai lo. Hnara khawn chawrh ang mai a ni a, a nihna takah chuan engtinnge kan tlawm theih zawk ka hrethiam lo," a ti!

Liverpool fans tan chhuanlam tur a awm a, City ground-ah Reds hi an ṭhat dan berin an inlan lo - Luis Diaz, Diogo Jota, Joel Matip, Naby Keita, Ibrahima Konate leh Darwin Nunez te hliam vangin an inlan thei lo a, midfielder Thiago Alcantara damlohnain team a pui lo.

Forest-in tha thona, chak duhna leh huaisenna hmangin Liverpool an hmachhawn a, an duh tak point thum an hawn a, Liverpool tan erawh champion beisei a harsa zui zel.

Klopp chuan, "Point thum hmuh duhin he hmunah hian kan lokal a, kan tan chuan a na a ni - hun dang ang chu ni se, hetiang match-ah chuan chak tur kan ni," a ti a, chak ngei tura inngaihna match-a an tlawm chu a la na hle.

Nottingham erawh tun season-a a vawi hnih nan an chak a, an phur thar hle. Bournemouth, Chelsea, Wolves leh Aston Villa ten coach an ban laia Steve Cooper ring tlattu Forest thuneituten an duh an hmu a, ban a hneka kum 2025 thleng atana contract thar an pek Coach-in an lawmna a thlen ta.

Cooper chuan, "Hna ṭha tak kan thawk a, kan chhunzawm zel ka beisei," a ti a, Liverpool-a hnehna an chan hmangin an team dinhmun siamrem a inbeisei.

Liverpool laka a goal khung lawm duh lotu Awoniyi chuan, "Liverpool laka goal khung hi ka theihnghilh ngai lo ang. Nigeria aṭanga min hruai chhuaktu an ni a, an chungah ka lawm kumkhua ang," tiin a sawi.

Reds-in inkhel an thlirkir ang a, Virgil van Dijk leh Roberto Firmino ten holam taka chance an hlahte kha an ui vawng vawng ang.