Messi hi khawvela ṭha ber a ni - PSG coach

Lionel Messi leh Kylian Mbappe ten Zirtawpni zan khan football hmuhnawm an chhawp chhuak a, goal an khung bakah an insiamsak tawn ve ve. Inkhelh banah Paris Saint Germain coach Christophe Galtier chuan Messi chu footballer piang tawh zinga ṭha ber a nih thu a sawi.

PSG tan Messi-a'n goal khat a khung a, a siamsaktu chu Mbappe a ni. France international Mbappe-a khung tur hi Messi chuan vawi hnih a siamsak ve thung, an mikhualna ramah Ajaccio chu 3-0 in an hneh.

Ligue 1 hmahruaitu PSG coach Galtier chuan, "Ajaccio khan a tir lam minute 25 chhung chu min tibuai thei viau. Mahse, stadium chhunga Messi inkhel en tuma lo kal ten an kal chhan chu a hnu lamah an hmu.

"Ball a chan apiangin a hlauhawm a, a ṭhiante tan a ṭangkai em em bawk, a nihna takah chuan football player awm tawh zinga ropui ber a ni," tiin an thiampuipa chu a dah sang hle, a hmang ṭangkai chhunzawm zel bawk ang.

PSG hian hrem vangin Neymar an chhawr thei lo, tun karah Champions League khelh tur an neih chhunzawm avangin Neymar a hahdam zeuh kha thil pawi a ni hran lo ang. Ligue 1 bakah UCL nomawi lak chu PSG thil tum bulpui ber a ni.