Milan, Juve leh Inter an chak

Serie A champion lai AC Milan bakah champion tum zinga mi Inter Milan leh Juventus ten an khingpui ṭheuh an hneh vek, nizan khan hmahruaitu Napoli leh AS Roma an inkhel a, result erawh kan hre hman lo thung.

Milan hian Brahim Diaz-a goal hnih bakah Divock Origi leh Rafael Leao te goal hmangin Monza 4-1 in an hneh a, point 26 hmuin a chung bera awm Napoli an nih rual, match khata an khelh hnem avangin an inkar erawh a la zau leh thei.

AC Milan manager Stefano Pioli chuan, "World Cup avangin inkhelh hun a inhnaihchilh nasa a, insiamrem thiam a ngai dawn hle. Ka naute zingah pawh match khel hnem bik an awm a ngai a, an taksa dinhmun a zirin kan insiamrem zel ang," a ti.

Inkhel dangah Inter Milan an vannei. Fiorentina mualah team pahnih 3-3 in an inhnehtawk teuh viau, mahse hun tawp hma chiahin Henrikh Mkhitaryan chuan 4-3 a chakna goal a khung a, coach Simone Inzaghi naute tan chuan goal hlu bik a ni ngei ang.

Juventus pawhin beisei an la nei tih an lantir, an mikhual Empoli 4-0 in an sawp. Old Lady hi pariatnaah an la awm a, champion beiseina la nei mah se, an tan chuan a sang zual pali zinga tel ringawt pawh lawmna tur a ni ang.