Bellingham-a'n goal hnih a khung

England rawlthar duhawm Jude Bellingham chuan goal hnih khungin Borussia Dortmund chu Stuttgart lakah 5-0 in a chakpui. Bellingham bakah hian Niklas Sule leh Giovanni Reyna leh Youssoufa Moukoko ten goal khat ṭheuh an khung bawk.

Dortmund hian tun season Bundesliga match 11 aṭangin point 19 an hmu a, pangana dinhmun an luah. Season bul an ṭan fuh tawk loh avangin an hnufual hman viau, tun dinhmunah hmahruaitu Union Berlin chu point liin an phak lo, match khatin an khel hnem thung.

Champion lai Bayern Munich pawh an chak. Bavarians hian Jamal Musiala leh Eric Maxim Choupo-Moting te goal hmangin Hoffenheim chu 2-0 in an hneh a, August thla hnua a vawi khat nan league match bikah a zawnin hnehna an chang ve leh chiah.

Bayern Munich hian Nilaini zanah Champions League khel turin Barcelona an lenchilh ang. German champion hi last 16 lut turin an tling chiang tawh a, tlang tawh mah se Nou Camp-ah ngei Barca hneh an châk ang, an ti mai mai chuang lo ang tih a rin theih.