The Phenomenon: The 'Original' Ronaldo

Ni e, Ronaldo tia sawi hian Cristiano Ronaldo hmel chu a langsar zawk a ni ta rih a, Brazilian striker ropui Ronaldo kha chu 'Brazilian' tia sawi kher lo pawhin 'Ronaldo Pathaua' tih a ngai ta. 

Mahse, rual u zawk - marble chhawm nihawichi chip phak leh Backstreet Boys hla a lam phak chin, David Beckham leh Victoria inngaihzawn lai buaipui pha chin tan chuan 'Pathaua' hi a thiam zawk a ni tlat!

Ni e, Cristiano hming kan hriat hma khan Ronaldo pahnih an lo awm daih tawh - khup hliam hma Ronaldo leh khup hliam hnu Ronaldo! 

Khup hliam hma Ronaldo chuan kum 23 vel thleng bak a daih lo a, mahse khatihlai khan ram leh club tan goal 200 chuang a khung daih tawh a, footballer piang tawh zinga ropui ber tur ang hiala ngaih a ni. 

A duhtui zualin 'The original Ronaldo' tih khera an sawi striker hi a khup hliam hnuah pawh striker ropui tak a la ni tho a, mahse, "Ropui ber," tia koh a rem ta lo erawh amah ngaisangtute tan chuan a na a ni. 

Mahse, he striker hian mi tam tak career tawp phahna ang khawpa khup hliam a nei chungin World Cup nomawi a chawi a, top scorer a ni bawk. 

September 18, 1976 khan Ronaldo Luís Nazário de Lima tih hming chawiin Rio de Janeiro khawpui lian taka hmar lam veng pakhat Bento Ribeiro-ah Brazilian striker ropui hi a piang a, Brazil-a naupang dang ang thoin football chu a atchilh ber a ni nghal. 

Kum nga mi lek ni a, ama hming Ronaldo tih ngei pawh 'Dadado' tih baka a lam thiam loh lai khan Real Madrid legend hian footballer nih duhna thinlung a nei daih tawh a, a ke leh football chu thil inzawm tlat a ni. 

Ronaldo chuan, "In te tak te, mahse kawt tual zau tak neiah ka seilian a, kan inkawt chu ka tan khelmual a ni. Ka u te pahnih nen kan inkhel ṭhin a, min bansan hnuah pawh kan in kawta thingkung te chu tlan helin ka inkhelhpui ṭhin," a ti!

Hetihlai hian Ronaldo hi mi tam tak tan chuan naupang a mai a ni a, mahse he naupang pakhat hian 'dream' ropui tak a nei - khawvela footballer piang tawh zinga a ṭha ber nih a tum tlat. 

Ronaldo hi a chhungten lehkha zir a, eizawnna zahawm tak nei turin an duh a, a 'talent' dawn erawh a 'ke' hmanga thawh tur a ni thung si. A chhungten fapa lehkhathiam tak neih an beisei laiin ani erawh a nun pum chu 'football' a ni. 

Talent a neih miau avangin kum 13 a nih chuan club hrang hrangin Ronaldo an en thla tawh a, kum 15-a nihin Brazil national team training zawm turin koh a ni a, kum 16 mi lek a nihin Brazilian club tana a match hmasa ber a khel. 

Professional footballer a nihna anga a match hmasa ber a khelh aṭanga kum khatah World Cup team-ah telh a ni a, an champion! Ronaldo chuan, "Engkim kha a thleng chak em em ringawt mai a ni. 

"World Cup 1994-ah khan minute khat pawh ka khel lo. Mahse, engkim kha uluk takin ka en a, zir theih ang zawng zawng chu ka zir. Ni e, engtikah emaw chuan World Cup khel turin ka la kir leh dawn tih hi ka hre tlat a ni," a ti. 

World Cup 1994-ah hian Ronaldo hian a player ngaihsan leh entawn Romario a tawng a, Brazilian striker hian rawlthar beiseiawm Ronaldo hi Europe pan ngei turin a fuih. 

Ronaldo hian a ngaihsan Romário zinkawng ang zawh ve duhin Europe a pan a, Romario club hlui PSV-ah bul a ṭan. Ronaldo chuan, "Romario chuan La Liga nomawi chawi a nawmzia te, Champions League final khelh hlutzia te min hrilh a, khawvela a ṭha ber ni tur chuan Europe pan a ngai tih ka hre nghal a ni," a ti. 

Brazilian striker hian Europe a pan rualin tum fel tak a nei nghal a, PSV-a a season hmasa berah goal 30 khung nghal turin a intiam - inelna hrang hrangah match 36 khelin goal 35 a khung a, a intiamna a ti hlawhtling chiang hle. 

PSV-a a season hnihnaah match 21 khelin goal 19 a khung a, Europe-in Ronaldo a hre ta. Inter Milan leh Barcelona an lo lang a, Catalan club hian a hunlaia khawvela footballer manto ber ni turin dollar maktaduai 19.5-in an lei. 

Ronaldo hian footballer nih a duh satliah lo a, hlawh neihah a lungawi tawk hek lo - a duh ber chu khawvela a ṭha ber nih chu a ni a, kum 1996-a Barca a pan hian, "He hmunah hian khawvela a ṭha ber ka ni dawn a ni," a ti. 

Brazilian striker hian a theihna a hrechiang a, a zam ngai lo. A sawi lawk ang ngeiin Barcelona-ah ropui takin a khel a, match 49-ah goal 47 a khung teh reng a nih kha! Ballon d'Or chawimawina pek a ni a, hetihlai hian kum 21 mi lek a ni. 

Hetihlai hian Ronaldo hian chhuang takin a hnathawhte chu a sawi ṭhin a, mahse inhmuchhuak turin a duh rei lo. Ronaldo chuan, "Khelmualah ka theihna chu ka lantir mai tur a nih laiin mi hriatah ka puang zar nasa mah mah a, ka mizia a ni lo tih ka hrechhuak thuai a ni," a ti a, midang entawn a tum luatah a nun a hloh ṭep thu a sawi. 

Barcelona-a season khat a hman hnuah Inter Milan chuan dollar maktaduai 27-in an lei chhuak a, a vawi hnih nan khawvela footballer manto bera ni nawn!

Italian club-a a season hmasa berah pawh Ronaldo a talbuai lo. Serie A lama defender ṭha rual awm lai taka lut ni mah se inelna hrang hrangah match 47 khel chungin goal 34 a la khung cheu a, UEFA Cup nomawi a chawi.

Mahse, Ronaldo hian beisei a la nei - World Cup nomawi chu! Kum 1998 nipui a her chhuak a, France-ah Brazil jersey ha chungin a feh chhuak. Final an luhna kalkawngah goal li a khung a, nomawi a beisei. 

Vanneihnain Ronaldo a duhsak reng bik lo - final an khelh dawnin a nuamsam lo thut a, a inkhelh theih loh a hlauhthawnawm hial. Inkhelh dawn hnai tawh takah doctor-in a inkhelh theih tawh tur thu a sawi a, khelhtir a ni. 

Mahse, dam kawr Ronaldo a khel hleithei lo a, a tan chuan mualphona mai a ni. Inelna thlengtu France lakah Brazil an mualpho a, 3-0 in an tlawm. Ronaldo hmuh tur a awm lo a, French midfielder Zinedine Zidane thiamzia khawvelin a hmu thung. 

World Cup nomawi chawi lo mah se Ronaldo a beidawng lo. Kum naupang tak a la ni a, chance tam tak a la neih tur thu mahnia inhrilh chungin a infuih. 

Mahse, vanduainain Ronaldo a kiansan lo - November 21, 1999-a Lecce nen Serie A match an khelh ṭumin a khupah hliam a tuar a, April 12, 2000-ah Lazio hmachhawnin lo kir mah se minute ruk bak a inkhel hman lo tihin a khupah bawk a inhliam. 

Ronaldo chuan, "Naupangte nichunga football ka hlimpui ang tho khan PSV, Barca leh Inter-ah te pawh nuam ti takin ka khel a, football chu ka tan nunna a ni. Ka khupa hliam ka tawrh khan ka nun pum chu tihchhiatin a awm a ni ber mai," a ti. 

Brazilian striker hian khelmual tel lo nun a mitthla thiam lo - "Dam duhin khawvel hi ka hel chhuak a ni," a ti hial a, a kea football awm chunga tlan leh chu a thil chak ber a ni. 

Hliam na tak a neih lai khan Ronaldo hi, "I kal leh thei a nih chuan lawm rawh," tiin doctor-ten football khelh leh theih an beiseipui tawh loh thu an hrilh a, rilru huaisen lo tan chuan beidawnna tham a ni. 

Mahse, Ronaldo a ni tlat a, a beidawng ve ngai lo - khup hliam na tak a tawrh aṭanga kum thum a liam meuh chuan World Cup khel turin South Korea-ah a awm leh der tawh a, final an lut. 

Final an khelh hma hian Brazil coach Luiz Felipe Scolari chuan a naute hi Brazilian television channel Globo-a entir a, Brazil squad-a player-te khua an tlawhna chu he channel hian an chhuah. 

Ronaldo chuan, "Ka inkhelh ṭhinna kawngpui dung te chu ka hmu a, ball pet ka zirna bangte pawh ka hmu. Footballer ka ngaihsante lem ka ziak ṭhin anga naupangin ka lem an ziak lai pawh ka hmu a, chu chuan phurna nasa tak min pe a ni," a ti. 

World Cup 2002 final-ah hian Brazil hian Germany an hmachhawn a, half time-ah 0-0 a ni. Ronaldo chuan, "Goal kan khung ngei kha kan ring a, 0-0 a ni chung khan hlauhthawnna kan nei lo," a ti. 

Ronaldo tan chuan pressure a san poh leh inkhelh a nuam - chu chu ama ṭawngkam ngei a ni a, a zam ve ngai lo. Brazilian striker hian goal hnih a khung a, 2-0 in an chak. 

Kal thei tawh lo tura an sawi kha World Champion a ni ta. Ronaldo chuan, "Minute 90-naa min lakchhuah khan ka inkhelh theih tawh loh tur thu min hrilhtute kha ka mitthlaah an lo lang a, ka kal theih pawh beisei lotute kha theihnghilh an harsa a ni. 

"Ka hawi chhuak a, cell phone chhuahtirh lai kha a ni a, ka lam hawia phone an lek chhuak fur lai ka hmu. Mak tak a ni. Kil khatah chuan ka hun tawn thim taka min puitu, Brazil national team press secretary Rodrigo Paiva ka va hmu a, ka ṭap ringawt mai a ni. Chu chuan ka ngaihtuahna chu a hrilhfiah thui ber," a ti!

Hliampui na tak a tawrh hnua World Cup nomawi chawi thei a ni a, Brazilian striker hi engti kawng pawhin sawi nep theih a ni lo - a pawi ber erawh "Ta se..." tia a football thawnthu ziah tawp a ngai fo hi a ni. 

Ni e, a career tam zawk hliam a neih hnua a hmang chungin ropui takin a hun a hmang a, amah ang hi an piang tam lo. Kum 1998 UEFA Cup final-a Alessandro Nesta nena an inhmachhawnte kha ngaihnawm a tling. 

Italian media te chuan Serie A striker ṭha ber vs defender ṭha ber tiin intawn tur hi an thlir lawk a, a hun a thlen meuh chuan Ronaldo hian Nesta a ching phar hneh hle. Amah Nesta ngei hian sawiin, "Video chu ka en nawn leh ṭhin a, ka tihsual ka zawng. A tawpah chuan tihsual ka nei lo tih chu ka thutlukna a ni a, Ronaldo kha engti kawng pawhin dan theih a ni lo," a ti. 

Ronaldo thiamzia leh ropuizia ziak zel dawn ila, hmunin min daih lo. Ni e, amah ngeiin football a mangṭha dawna, "Tawp thei miah lo se ka duh a ni," a tih ang khan a chanchin ngaihnawm hi ziah tawp mai atan chuan a uiawm a ni. 

Kum 1990 chhoa an vanglai hun hmang player tam zawk chuan Ronaldo aia footballer ṭha an la pian loh thu an sawi ṭhin a, Messi leh Cristiano rawn lan hnua mite erawhin hei hi pawm harsa an ti. 

Cristiano hi Manchester United tana 2009 thleng a khelh khan kum 24 a ni a, Sporting Lisbon leh United tan inelna hrang hrangah match 292 khelin goal 118 a khung.

Kum 2011 khan Lionel Messi-a'n kum 24 a tling a, 2011 season ṭan hma thleng khan Barcelona tan top flight match 269 a khel tawh a, goal 180 a khung. 

Ronaldo-a'n kum 1999-a hliampui na tak a tawrh khan kum 23 mi a ni a, Cruzeiro, PSV Eindhoven, Barcelona leh Inter Milan tana khel tawhin match 228 a khel a, goal 194 a khung hman!

- Luis Enrique

- Quinton Fortune

-  José Mourinho

Football-a kan la hmuh ngai loh min hmuhtirtu chu Ronaldo hi a ni. 

-Thierry Henry

- Marcel Desailly

- Gary Neville

Cruzeiro

Campeonato Mineiro: 1994

Copa do Brasil: 1993

PSV Eindhoven

KNVB Cup: 1995–96

Johan Cruyff Shield: 1996

Barcelona

Copa del Rey: 1996–97

UEFA Cup Winners' Cup: 1996–97

Supercopa de España: 1996

Inter Milan

UEFA Cup: 1997–98

Real Madrid

La Liga: 2002–03

Intercontinental Cup: 2002

Supercopa de España: 2003

Corinthians

Campeonato Paulista: 2009

Copa do Brasil: 2009

FIFA World Cup: 1994, 2002; 

runner-up: 1998

Copa América: 1997, 1999; 

runner-up: 1995

FIFA Confederations Cup: 1997

Summer Olympic Games bronze medal: 1996

Mimal chawimawina (langsar zual)

Supercopa Libertadores top scorer: 1993–94

Supercopa Libertadores Team of The Year: 1993-94

Eredivisie top scorer: 1994–95

FIFA World Player of the Year (3): 1996, 1997, 2002

Pichichi Trophy: 1996–97, 2003–04

European Golden Shoe: 1996–97

World Soccer magazine World Player of the Year (3): 1996, 1997, 2002

La Liga Foreign Player of the Year: 1996–97

Copa América Most Valuable Player: 1997

FIFA Confederations Cup All-Star Team: 1997

Copa América All-Star Team: 1997, 1999

IFFHS World's Top Goal Scorer of 

the Year: 1997

Onze d'Or: 1997, 2002

Ballon d'Or: 1997, 2002

UNICEF European Footballer of the Season: 1996–97

European Sports Media ESM Team of the Year: 1996–97, 1997–98

FIFA XI: 1997, 1998

Serie A Footballer of the Year: 1998

Serie A Foreign Footballer of the Year: 1998

UEFA Cup Final Most Valuable Player: 1998

UEFA Club Footballer of the Year: 1997–98

UEFA Club Best Forward: 1997–98

FIFA World Cup Golden Ball: 1998

FIFA World Cup All-Star Team: 1998, 2002

FIFA World Cup top assist provider: 1998

FIFA World Cup Golden Shoe: 2002

FIFA World Cup Silver Ball: 2002

FIFA World Cup Final Most Valuable Player: 2002

Intercontinental Cup Most Valuable Player: 2002

UEFA Team of the Year: 2002

BBC Overseas Sports Personality of the Year: 2002

Laureus World Sports Awards Comeback of the Year: 2003

FIFA 100 (2004)

Brazilian Football Museum Hall of Fame: 2006

Golden Foot award: 2006

France Football magazine's all-time starting XI: 2007

Association of Football Statisticians (AFS) Top-100 Players of All Time: 2007 #2

Sports Illustrated Team of the Decade: 2009

Real Madrid Hall of Fame

L'Équipe's top 50 South-American footballers in history: #5

Italian Football Hall of Fame: 2015

International Federation of Football History & Statistics (IFFHS) Legends

Inter Milan Hall of Fame: 2018

Globe Soccer Awards Player Career 

Award: 2018