Chelsea leh Milan tan chak a ngai

Europe club lian Chelsea leh AC Milan te tan UEFA Champions League knockout stage thleng pha turin zanina chak a pawimawh. Zanin dar 10:15 hian Blues-in RB Salzburg hmachhawn turin Red Bull Arena an tlawh ang a, Milan-in zanin dar 12:15 hian Stadion Maksimir-ah mualneitu Dinamo Zagreb an hmachhawn ve bawk ang.

Intluktawk
UCL group stage-ah group E club-te hi an intluk tawk hle. An fixtures khelh chhoh danin a zir bawk a, group match tawp ber thlengin a ngaihnawm dawn niin a lang. Chelsea hian point sarih hmuin hmahruaitu an ni a, an khingpui tur Salzburg-in point ruk an neih tawh avangin an dinhmun a la him lo. Chutihrualin Graham Potter-a hote hian hnehna an chan a, Milan leh Zagreb te an inhnehtawk a nih chuan knockout stage an lut thei bawk.

Milan pawh match zawna Chelsea an hneh loh avangin chetsual a thiang tawh lo. Italian club hian point li an hmu a, an khingpui tur Dinamo Zagreb nen an point hmuh zat a inang. Team pahnih hi pathumna leh palinaah awm mah se a chak zawk tan match nga khelh zawhah pahnihnaah a awm theih a, inkhel tur hi a la pawimawh hle.

A awlsam dawn lo
Chelsea-in Graham Potter hnuaia an match hmasa berah Salzburg an mikhual a, 1-1 in an inhnehtawk. Blues-in Raheem Sterling hmangin goal an khung hmasa a, Salzburg-in Noah Okafor hmangin an sut. Stamford Bridge-ah Blues an chak theih loh chuan Red Bull Arena-ah chak a harsa dawn.

Matthias Jaissle hote hi tun inelnaa squad naupang ber an ni a, tlawm an la nei miah lo bawk. An mualah phei chuan Salzburg hi an deh a khirh hle. Europe-a match hnuhnung pasarihah tlawm an nei lo a, vawi nga chakin vawi hnih an inhnehtawk. Chelsea goal bawh a nat a ṭul a, kartawpa Manchester United laka an khelh dan thlir chuan insiamṭhat an mamawh tih a chiang.

Champions League bik thlir erawh chuan Blues hian Milan nen match hnih an khelhah goal nga khungin goal an chhuah lo a, an record hi a ṭha thlawt. Amaehrawhchu tlarhnung lam player Reece James, Kalidou Koulibaly, Wesley Fofona leh N'Golo Kante te inhliam hi buaina tham a tling. A bik takin James inhliam hi a pawi zual a, an goal bawh a nat loh phah.

Mahse, a êng zawnga thlir chuan Pierre-Emerick Aubameyang-a'n UCL match hnuhnung pahnihah goal a khung a, Salzburg lakah pawh Arsenal leh Barcelona ṭantute lawmna siam tawhtu hian Chelsea ṭantute lawmna a siam thei ang.

Salzburg tlarhmaah Noah Okafor hi chhinchiah a ṭha, kum 22 mi Swiss forward hi a ke a hmui - UCL-ah pawh goal thum a khung tawh. Okafor kawppui Benjamin Šesko pawh hi nipui bazara Manchester United nena sawizawm kha a ni a, kum 19 mi chauh la niin nakkum hian RB Leipzig a zawm dawn. Okafor leh Sesko hian Chelsea tan buaina an siam thei ang.

Milan an inpeih
AC Milan-in Zagreb an pan hmain league-ah Monza an mikhual a, 4-0 in an sawp. Italian club tan hian Brahim Diaz-a'n goal hnih a khung bakah Divock Origi leh Rafael Leao ten goal khat ve ve an khung. Dinamo Zagreb erawh kartawp khan Hajduk Split nen 1-1 in an inhnehtawk thung.

Dinamo coach Ante Cacic chuan, "Beisei kan la nei e," tiin Salzburg nena an inhnehtawk zawhah a sawi a, Croatian champion hian an mualah Milan barakhaih an tum ang. Milan manager Stefano Pioli chuan, "Kan kutah engkim a awm a, kan tum ram hi kan thleng thei," tiin knockout stage an mitthla thu a sawi ve bawk.