Bangladesh tibuai thei Netherlands

T20 World Cup Super 12-ah Netherlands an zahpuiawm loh, nimin khan Bangladesh nen an inhmachhawn a, run 9 chauhin an tlawm. Blundstone Arena, Hobart-ah Bangladesh-in bat hmasain 144/8 runs an siam a, Netherlands hian 135 runs-in an chhanglet.

Netherlands-in vawm hmasak an thlang a, Bangladesh tan che ṭha fal an awm lo. Afif Hossain (38), Najmul Shanto (25) leh Mosaddek Hossain (20*) te zarah 144 runs an siam a, target sang a ni lo.

Netherlands-in chak theihna hun ṭha nei mah se Vikramjit Singh leh Bas de Leede ten run an siam lo. Colin Ackermann-a'n 62 runs a siam zarah chak theihna kawng inhawng mah se Bangladesh bowler-te an chungnung ta zawk.

Netherlands hian October 27, Ningani chhun dar 12:30-ah India an hmachhawn dawn a, thilmak a thleng a nih ngawt loh chuan chak a harsa dawn. Bangladesh-in Ningani zing dar 8:30-ah South Africa an hmachhawn ang.

Nimin tlai khan Zimbabwe leh South Africa te an inkhel a, ruah sur vangin a hun an sawn tlai a ngai a, result kan hre hman lo a ni. Vawiin tlai dar 4:30 hian Australia leh Sri Lanka te an inkhel dawn. Inelna thlengtu Aussies hi an match hmasa berah an tlawm tawh avangin chak loh a thiang tawh lo.