Mala 'Chanmari vs BS-a 'Police'

Honda MPL9-ah vawiin chhun dar 12:00 hian Chanmari FC-in Mizoram Police FC an hmachhawn dawn. RG Stadium-a inkhel tur hi Chanmari leh Police an nih avangin en a châkawm a, coach tawnhriat nei ṭha K. Malsawmkima leh Lalbiaksanga Colney te kaihhruai a nih avangin a nep thei lo a, ni 10 liam taa an inkhelh tawhna hriat tel phei chuan en a châkawm lehzual hle.

Ni 10 liam ta chu
Chanmari FC-in Khawzawlah Chawnpui FC an hneh loh avangin coach thar K. Malsawmkima an lalut a, ni 10 liam ta khan RG Stadium-ah Police nen an inkhel. Mala hnuaia an match hmasa berah hian Aizawl FC hneh theitu Police an hmachhawn avangin beisei an nei sang lo a, mah se beisei phak baka ṭhain an khel chhuak.

Mala hote hian first half an thunun a, goal chance pawh ngah mah se goal khat chiah an khung avangin hun ṭha an bawhpelh. Police enkawltu BS-a'n tawnhriat rawn hmang ṭangkaiin second half-ah inkhel a rawn thlak danglam a, 1-1 inkhel a tawp.

Chanmari FC-in football hmuhnawm an chhawp chhuak a, point thum hmuh phu mah se point khat chauh an hlawh chhuak. Police erawh Police nge nge an tih ṭhin ang tho an la ni a, hun harsaah tawnhriat nei player-te danglamna a lang.

A hun a thleng leh ta
MPL9 phase 2 fixtures a chhuak a, beisei aia hmain Police leh Chanmari an inhmachhawn dawn a, en châkawmna erawh a nep phah lo. Chanmari hian Police laka an khelh dan avangin beiseina sang tak an nei a, amaherawhchu Aizawl FC an hneh lo - Mala hnuaia match hnih an khelhah point khat chauh an la hmu.

Chanmari coach Mala chuan, "Kan chak ve tawh ang chu. Inkhelah chuan chak tumin kan khel ṭhin a, tun ṭumah erawh kan tum lehzual a ngai. Theihtawp chhuahin kan khel ang," tiin Vanglaini a hrilh.

Chanmari hian point an hmuh loh chuan semifinal kawng a bumboh lehzual dawn a, Police pawh an chesual a nih chuan a sang pali aṭanga chhuak thei reng an ni tawh bawk. Police coach BS-a Colney chuan, "Chak a ngai, draw a thiang tawh lo. Kan dam kim ṭha a, kan inpeih. A hmaa kan inkhel kha kan tan inzirna ṭha tak a ni a, kan tisual nawn tawh lo ang," tiin Vanglaini a hrilh.

MPL9-ah hian goal 79 a lut tawh a, goal 10 khung tling club pali an awm tawh. Mak ang reng tak erawh goal 10 khung tling club zingah Police leh Chanmari an tel lo. Coach Mala leh BS-a ten chak an tum thu an sawi ve ve a, chak tur chuan goal khung a ngai dawn a, chakna goal khungtu chu a hming a langsar khawp ang.