Saints-in champion tum Arsenal an chelh ding

Premier League hmahruaitu Arsenal chuan Southampton lakah an goal an hum zo lo, an mikhualna ramah hian Saints nen 1-1 in an inhnehtawk. Mikel Arteta nauten EPL season kal laia an khingpui an draw vawi khatna a ni.

Granit Xhaka hmangin hma takah Gunners lamin goal an nei, defender Ben White siamsak chu Swiss midfielder hian a khung. Mahse, goal dang an neih belh thei lo a, point hmuh ngei tum Southampton lamin Stuart Armstrong hmangin an sut.

Europa League-ah player ṭha an chhawr a ngai a, kartawpah match an khelh zui zel a ngaih avangin Arsenal an chau tih a lang. Goal an chhuah hnuah Eddie Nketiah leh Kieran Tierney te hmangin team tih phur tum viau mah se, goal dang an nei thei ta bik lo.

Arteta-a'n Tierney aiah Takehiro Tomiyasu a ring leh a, Japanese defender hi Liverpool lakah khel ṭha viau mah se Saints lamak erawh a ven theih tura ngaih a veng thei lo, a hnuah a khelhna thlaksak ni mah se thil a danglam phah ta lo a ni.

Ralph Hasenhuttl naute an khel ṭha, goal an phurh hnuah pawh sut tumin an nawr ngar ngar. St. Mary's Stadium-a inkhel entuten an thlawp ṭha bawk a, team goal mawi an khung - a hmawr bawktu Armstrong khan fak a phu hle bawk.

Chak zo lo mah se Arsenal hi Premier League hmahruaitu an la ni tho. Manchester United lakah an tlawm bakah, tun ṭum chiah hi season kal laia point an hlohna a la ni, champion lai Manchester City aiin point hnihin an sang mek a ni.

Arsenal manager Arteta chuan, "Chak kan duh a, kan chak zo ta lo hi a na. Chutihrualin Southampton khan point hmuh an phu, kan inkhel result-ah sawisel tur a awm lo," a ti a, a duhthusam ni lo mah se point khatah lungawi a tum.

Gunners striker Gabriel Jesus-a'n hun ṭha bik vawi hnih a hlah a, captain Martin Odegaard goal khung chu a siamsaktu Tierney-a'n a cross hmain ball-in line a pel hman a, pawm a ni lo bawk.

Arteta chuan sawi zawmin, "Goal khung theihna remchang chu kan insiam reng, mahse kan khung hleithei lo. Premier League hmahruaitu ni reng tur chuan hun ṭha bawhpelh fo a remchang lo ang," a ti, kaltluang viau mah se match khat chetsual lekah an tlahniam thei.