Newcastle United lakah Spurs an tlawm

Antonio Conte enkawl Tottenham Hotspur-in Champions League khel phak tura an tlinna an lawmna kha a la rei lo. Premier League season bul ṭha taka an ṭanna phei chu hmanni lawk a ni - Italian manager hian tunah chuan pawisa an mamawh thu a sawi leh ta!

Spurs hian Pathianni zan khan Newcastle an mikhual a, goal hnih an phurh hnuah Harry Kane hmangin sut ṭhen ve mah se an sut zo thei lo. Anmahni mualah ngei mai Magpies chu 2-1 in an hneh lo, a zawnin league match hnihah an tlawm.

Inkhel tir lamah Tottenham an hlauhawm zawk, forward ṭha Son Heung-min leh Harry Kane te pawhin goal khung theihna remchang an nei ve ve. Mahse, keeper Nick Pope a chesual duh tlat lo.

Khua a dur a, ṭek tla leh khawpui rite chuan Eddie Howe naute chakna thahrui a pe emawni tih mai tur a ni. Callum Wilson leh Miguel Almiron te goal hmangin hma an hruai a, second half-ah goal khat chhuah ve mah se point thum an hlawh chhuak.

Conte hian an goal chhuah hmasa zawk chu pawm loh tur nia a hriat thu a sawi bawk. Box pawnah Callum Wilson leh Hugo Lloris te an insu a, keeper Lloris a tluk laiin Wilson hian a pet khum a, hla deuh tak aṭangin goal a khung.

VAR hmangin rei tak ennawn a ni a, chumi hnuah goal atan an pawm. An goal hnihna Almiron khungah erawh sawisel tur a awm lo, huaisen takin box chhungah ball a lalut a, amah rawn hnaihchilh tumtu Lloris dan hman lohin a pet goal daih.

Spurs hian hliam vangin Brazil forward Richarlison, Sweden winger Dejan Kulusevski, Argentina defender Cristian Romero leh Denmark midfielder Pierre-Emile Hojbjerg te an chhawr thei lo.

Nipui bazar tawp lamah khan Conte-a'n player pahnih lak belh an la ngaih thu a sawi a, mahse an lak belh lo. Conte chuan, "Dawhtheihna kan mamawh, zep lohah chuan pawisa kan mamawh bawk," tiin a sawi.

Italian manager hian a rilrua awm a zep ve vak ngai lo, season hmasa pawh khan ban a ṭul a nih chuan a hreh loh thu thlengin a sawi tawh a nih kha, kuminah pawh an che fuh lo a nih chuan club thuneitu lam tana hriat nuam vak lo pawh a sawi leh mai dawn niin a lang.

Spurs an chak loh vanga an ngui laiin Newcastle erawh an kang sang zel. Premier League season kal laiah Eddie Howe naute hian goal 10 chiah an la chhuah a, goal chhuah tlem ber an nih avangin palina nih hi an phu hle.

Magpies hian sum an nei, mahse an hmang huau huau lem lo. An mamawh leh chhawr thiam tur tawk an la khawm a, tunah chuan team nghet pangngai tak an din ta. Season tharah Champions League an khel phak lo a nih pawhin, team lian dang tana hnawksak an ni phak mek.

Howe chuan, "Pawisa ni loin player-te khelh dan kha ka ngai pawimawh, eng team pawh ni ila, engtianga din nge tih aiin an khelh dan a pawimawh zawkah ka ngai. Tunah chuan kan tum ram thleng turin theihtawp kan chhuah mek a ni," tiin a sawi.