Odisha mawina Jerry Mawia

Pathianni zan Indian Super League inkhelah Odisha FC tan Jerry Mawihmingthanga'n goal a khung a, a khel ṭha takzet bawk - Chanmari tlangval hian a team chu Kerala Blasters lakah 2-1 in hnehna a chanpui.

Blasters tan Harmanjot Khabra chuan goal hmahruai khung mah se Odisha-in Jerry leh substitute Pedro Martin hmangin an chhanglet a, 2-1 in hnehna an chang ta zawk a ni.

Odisha-in an match hmasa bera Jamshedpur (3-2) an hneh hnuah Mumbai City (2-0) ngam lo mah se, Blasters lakah an insiamṭha zui a, Jerry chuan, "Tun season-a kan tum ber chu playoff khelh phak a ni a, kan ti thei a nih chuan champion te pawh kan la sawi ve leh ang chu," tiin Vanglaini a hrilh.

Hei le Jerry
Jerry-a'n beisei angin season bul a ṭan ṭha tawk lo a, Blasters lakah erawh a hmuhnawm takzet - minute sarihna lekah Jerry hian goal a khung a, mahse, referee-in foul a ham miau avangin goal-ah pawm a ni lo.

Jamshedpur winger hlui Jerry chuan, "Goal chiang tak a ni a, referee pawh khan sawifiah ngaihna hre chuang loin a pawm lo ringawt a ni. Mahse, a tawpa kan vanneih chhante pawh a ni mai thei asin," tiin Vanglaini a hrilh.

Jerry-a goal khung pawmsak a nih loh hnuah Khabra chuan Blasters tan ṭha zetin a tauh lut a, mahse, minute 54-naah Jerry hian hnai tak aṭangin a ti goal a, Pedro chuan minute 86-naah chakna goal a khung zui.

Mizo tlangval
Jerry-a vanneih zan ni se goal tam zawk khung thei a ni - a goal khung pakhat pawmsak a ni lo a, Diego Mauricio leh Pedro ten a siamsak ṭha zet goal-a an chantir loh chu uiawm a tling a, Isak Vanlalruatfela siamsak a tauh goal loh pawh a ui vawng vawng ang.

Jamshedpur tan pawha lo khel tawh Jerry chuan, "Kan chak a, goal ka khung bawk a, chu chuan phurna min pe. Season ṭantirah harsa kan ti deuh hlek a, tunah chuan kan insiamrem ṭan tawh e," tiin Vanglaini a hrilh.

Odisha tan Jerry bakah Isaac Vanmalsawma chuan inkhel bul a ṭan a, bench aṭangin Isak-a leh Paul Ramfangzauva te an lut bawk - Blasters lamah K. Lalṭhathanga chuan inkhel bul a ṭan bawk.