Aizawl FC hneh châk Venghnuai

Khelmual remchan loh avangin Honda MPL9 round 6 kha Khawzawla zin zawhah neih a ni a, RG Stadium-a inkhel boruak a sang hle. Aizawl FC-in hun tawp dawn hnaiha penalty vawi hnih hmangin FC Venghnuai 2-1 in an lehthal, Venghnuai ṭantute referee chungah an lungawi lo.

Vawiin tlai dar 3:00 hian RG Stadium-ah Aizawl FC leh FC Venghnuai an inkhel leh dawn a, tu nge ṭha zawk chu a chiang ang. An inkhelh hmasak zawk ṭumah Venghnuaiin chak phu zawkah an inngai a, an lungawi thei lo. Venghnuai coach Rindika Hmar pawhin, "Referee-te hi inenfiah ve teh se," ti hialin a sawi.

Venghnuai hian Aizawl FC hneh an châk dawn tih a chiang a, NorthEast aṭanga I League nomawi chawi thei awmchhun club hneh hi eng club tan pawh a châkawm ve hrim hrim bawk. Aizawl FC technical director Hmingthansanga chuan, "Kan tan chuan eng match pawh hi a harsa vek. Aizawl FC an hmachhawn chuan team tin hian an theihna zawng zawngin an khel ṭhin," tiin Vanglaini a hrilh.

Aizawl FC hi hmahruaitu an ni mek a, Venghnuai hi pahnihnaah an awm. An intawn hmasak ang thoin a sang pahnih inkhel tur ni mah se Rindika hote hi an chak loh chuan palinaa tla thla thei an ni. Hemi a nih avang hian Venghnuaiin pressure an ngah zawk a, Aizawl FC hneh an châk tih a chian ang bawkin inkhel a hmuhnawm dawn tih a chiang hle.