Premier League inkhel a tlem dawn

Kartawp Premier League inkhel en tur a awm leh dawn a, mahse kar dang ang lo takin match li bak en tur a awm dawn lo - club lian zingah Manchester City chu inlan tur awmchhun an ni. 

Premier League chuan season dang ang lo takin club-te tan thlasik chawlh a siamsak a, chawlh zat inang an neih theihna turin fixture pawh uluk takin an duang. 

Tun kartawpah league match li a awm ang a, karlehah match ruk khelh a ni thung ang. June 2018 khan Football Association, Premier League leh English Football League-te chuan he dan hi zawm turin an siam a ni. 

Premier League-a 'Big Six' tia hminglem an pek zinga mi Manchester City chu tun kar tawpa inlan tur awmchhun an ni a, Pep Guardiola naute hian West Ham chu Pathianni zan dar 10:00-ah an mikhual ang. 

City hian Liverpool an thlauhna a tam tawh avangin champion an beisei tawh lo a, point 22-in Reds hi an thlau mek. Mahse, an hnuaia awm Leicester City-in an um ve reng avangin pathumna aia hniama awm hi an tan mualphona a ni dawn a, tha thlah hun a ni lo. 

West Ham-in tun hnaiah sum an hloh thu vantlang hriatah an puangzar a, "Kan harsatna aṭanga tal chhuak tur chuan Premier League khelh chhunzawm a ṭul ang," an ti a, table-ah 25-na an ni mek. Etihad Stadium-ah 'draw' game khel hman an ni tawh lo tih an hria ang. 

Sterling tel lohnaManchester City-in malpui hliam vangin Raheem Sterling an chhawr thei dawn lo a, City hian social media lamah an player pawimawh an chhawr theih loh tur thu hi an tarlang tawh. 

Kum 25 mi forward hi Tottenham Hotspur laka 2-0 a an tlawmna inkhelah khan a inhliam a, Sterling hian season kal laiah match 35 khelin goal 20 khung tawh mah se kum 2020-ah goal a la khung lo - tunah a inhliam zui. 

Hrem vangin Oleksandr Zinchenko a inlan thei dawn lo chiang a, Hammers lamah Jack Wilshere leh Andriy Yarmolenko la chawl mah se Felipe Anderson erawh bench tal luah thei tura beisei a ni.

Arsenal: Gunners player-ten Feb 2 hnuah chawlh an nei reng a, tun hnai khan Dubai khawlum hnuaiah training pek an ni. 

Aston Villa: Dean Smith-a'n player-te chawlh a pe a, Thawhṭanniah training an zawm ang. 

Bournemouth: Eddie Howe team te Pathianni zan dar 7:30-ah an inlan dawn a, chawlh an nei zui ang.

Brighton: Zanin dar 11:00-ah Watford an mikhual dawn a, Dubai-ah training tum zet mah se venhimna lama buaina avangin an ṭhulh. 

Burnley: Sean Dyche-a'n a naute chawlh hahdamna hun a pe.

Chelsea: Frank Lampard-a'n a player-te chu an chhungte nena hun thawl hmang turin a chawlhtir.

Crystal Palace: Roy Hodgson chuan a player-te tan football piahlam thil ngaihtuahna hun a ni thu a sawi a, zanin dar 6:00-a Everton an lenchilh zawhah chawlh an nei ang. 

Everton: Carlo Ancelotti chuan zanina Palace an hmachhawn zawhah a naute chu ni nga vel chawlh a pe dawn a, training an zawm leh thuai tur thu a sawi thung. 

Leicester: Brendan Rodgers chuan khawlum hnuaia training neih an tum chu an ṭhulh thu a sawi. 

Liverpool: Jurgen Klopp-a naute chawlh hmangin an zin kual a, an hun thawl neih khawhral an tum lo. 

Manchester City: Pep Guardiola chuan West Ham an hmachhawn zawhah a naute chu chawlh a pek tur thu a sawi. 

Manchester United: Feb 17-a league match nei chauh tur United player te vawiin thleng an chawl ang a, Marbella emaw Dubai-ah training an nei zui ang. 

Newcastle: FA Cup replay avangin chawlh ngah tawk lo mah se Steve Bruce chuan a player-te chu ni li emaw ni nga tal an chawlh tur thu a sawi. 

Norwich: Tun kartir aṭang khan Norwich player-te an chawl tawh a, mahse Liverpool-in an hmuah avangin training an zawm vat ang. 

Sheffield United: Pathianni zanah Bournemouth an hmachhawn ang a, chawlh an hmang zui ang. 

Southampton: Southampton-in FA Cup replay vangin chawlh an ngah tawk lo a, karlehah Burnley hmachhawn dawn mah se chawlh erawh an hmang tho.

 

Tottenham: Jose Mourinho-a'n Champions League last 16 khelh tur an neih tel avangin thlasik chawlh a ngaih pawimawh loh thu a sawi.

Watford: Zanina Brighton an hmachhawn zawhah player-ten chawlh an nei ang. 

West Ham: Pathianni zanah Manchester City an lenchilh dawn a, an chawlh hman dan tur an la puang lo. 

Wolves: Marbella-ah training neiin an awm mek.