A zawna vawi thum chak lo Lakers

Los Angeles Lakers an che fuh thei lo, a zawnin vawi thum an tlawm ta! NBA regular season an ṭan chauh a, an phur vanglai tak ni mah se LeBron James-a leh a ṭhiante an che hleithei lo.

Nimin zing inkhelah Lakers hian Portland Trail Blazers chu 106-104 in an hneh lo, hun tawp dawnah James-a'n remchang nei mah se a hlawhtling lo a, a team chu an mangchhia aṭangin a la kai harh thei rih bik ta lo a ni.

Portland tan Damian Lillard chuan point 41 a nei a, hnehna an chan theihna hnar pawimawh a ni. Lakers an chak loh lai hian Portland erawh tun season match thum an khelh tawhah an la chak vek, an boruak a inang lo hle.

Kum 37 mi James chuan, "Chak loh hi chu engtik lai mahin a nuam lo a, ka duh dan pawh a ni ngai lo. Hun kal tawhah eng ang hlawhtlinna nge kan chan tih lam pawh a ni lo, tun huna kan chak lo hi a pawi lai chu a ni. Portland khan chak phu zawkin an khel," a ti.

Lakers hian Ningani zing dar 7:30-ah Denver Nuggets an hmachhawn leh nghal dawn. Nuggets hi vawi hnih chaka ṭum khat tlawm tawh thung an ni a, awlsam taka hneh mai theih tur chi chu an ni lo ang.

Inkhel dangah Golden State Warriors an chak. NBA champion lai hi an match hnuhnungah chesual ve zauh mah se, nimin zingah erawh Sacramento Kings lakah 130-125 in an chak - Stephen Curry chuan point 33 a nei.