Real tan Benzema inlan thei dawn lo

Spanish champion Real Madrid chuan zanin dar 12:30 hian Champions League match khel turin RB Leipzig an lenchilh dawn a, an thiampuipa leh captain ni bawk Karim Benzema a inlan thei dawn lo.

Ballon d’Or dawng hlim Benzema hian a malpuiah hliam tenau a nei a, Inrinni zana 3-1 a Sevilla an hnehna inkhelah pawh a inlan tawh lo - hliam serious tak erawh a ni lo niin khawthlang media ten an tarlang.

Benzema hian tun season-ah match 11 khelin goal ruk a khung tawh a, hliamin a tihbuai leh ṭhin avangin a la inlan tam tawk lo.

Real tan Germany pana zin chhuak zingah Luka Modric leh Fede Valverde an tel lo bawk a, player pahnih hi Sevilla lakah inlan mah se an inhliam a, hliam serious tak erawh a ni loa tarlan a ni.

Mahse, Carlo Ancelotti tan lungphan lutukna tur erawh a ni lo - Real Madrid hian Champions League match li aṭanga point 10 nei tawhin, last 16 an lut chiang tawh.

RB Leipzig-in match liah point ruk an nei tawh a, zaninah Real an hneh a, tla tawh Celtic-in zanin dar 12:30-ah vek Shakhtar Donetsk an lo hneh chuan an tling ang.