Tuten nge knockout stage lut ang?

Honda MPL9-ah round riat khelh a ni tawh a, semifinal lut tur hriatthiam a la har hle. Table thlirin Aizawl FC chu an him mai a rinawm tawh a; FC Venghnuai, Chawnpui FC, Mizoram Police leh Chinga Veng FC ten hmun ruak pathum hi an inchuh dawn niin a lang.

Player neih dan thlir tel erawh chuan Chanmari tan pawh kawng zau tak a la inhawng a, MPL ṭantirh aṭanga tel CFC hian knockout stage an la inpetkai ziah. FC Bethlehem leh Electric Veng FC tan pawh chhiarkawp dan chuan semifinal kawng a la inhawng zau bawk.

A him chin point 21!
Mizoram Premier League-ah semifinal khel tur chuan a sang pali zinga tel phak a ngai a, semifinal khel pha tura a him chin hi inkhel result a zir ni mah se inelna neih tawh dan enlet chuan point 21 hi a him chinah a ngaih theih. MPL3 aṭangin semifinal hi a awm ṭan a, point 21 hmu chin chuan semifinal an la lut vek.

Chutihrualin table hnuai lama awm Chanmari FC, FC Bethlehem leh Electric Veng FC te hian a chunglama awm laka point an hmuh belh tawh miah loh chuan point 21 hi a la him lo thei bawk. Point a insemrual ṭhat chuan semifinal lut turin point hmuh tam a ngai lo thei - MPL4-ah khan Zo United chuan point 17 hmuin semifinal an lut tih hriat a ṭha.

Nov 12-ah I League
Kumin I League hi November 12-a khelh tura ruahman a ni a, inelna ṭan meuh chuan MPL-ah round hnih chauh khelh tur a awm tawh dawn avangin Aizawl FC-in semifinal an lut fel tawh ang.

I League ṭan hnua Aizawl FC hmachhawn theih chu Chhinga Veng leh Electric Veng te an ni a, club pahnih hi AFC squad pan zawk an hmachhawn theih avangin table-ah nghawng lian tak erawh a awm thei thung.