Goal li khungtu Barca an chak chiang

Real Madrid chak thu hre sain Pathianni zanah Barcelona an inlan a, Xavi nauten chak loh an duh bik lo - an mikhual Athletic Bilbao lakah goal li an khung a, 4-0 ngawtin hnehna an chang.

Barca tan Ousmane Dembele, Sergi Roberto, Robert Lewandowski leh Ferran Torres ten goal khat ṭheuh an khung a, hun tawp thlenga goal dang a luh loh avangin an chak chiang.

Barcelona-in hnehna an chan avangin table-ah pahnihna an ni leh ta a, match 11 khelh tawha hmahruaitu Real Madrid an thlauhna chu point thum chauh a ni.

Pathianni zan inkhel ngaihven hlawh dangah Atletico Madrid chuan 2-1 in Real Betis an hneh a, Antoine Griezmann chuan goal hnih khungin, Betis tana Nabil Fekir goal khat khungin awmzia a nei phak lo.

Barca an thiam
Nou Camp-ah Barca-in goal khung turin hun an mamawh rei lo. Minute 12-na lekah Dembele chuan ṭha zeta ball a lakluh hnuah goal-ah a shot a, Bilbao keeper Unai Simón chuan lo dang mah se a per lehlam chu Lewandowski chuan mahnia pet mai loin penalty box-ah a thlawh lut.

A awmna tur taka lo awm Dembele chuan a tauh a, Spain international keeper tan dan hman a ni tawh lo. Barca-in chawlh an tum lo. Minute ruk a liam hman awrh a, Dembele bawk kan hmu nawn.

French forward hian Sergi Roberto tan a siamsak a, Spanish right back tan goal-a chantir loh a mawi lo; 2-0 a ni fel der a, a la tawk lo cheu - Barca an phur laklawh a ni ber!

Minute 22-naah Dembélé bawkin Lewy tan a siamsak a, Polish striker hian mawi zeta a inherpui hnuah goal-ah a chantir. Kum 34 mi striker tan tun season La Liga match 11-a goal 12 a khungna chiah a ni a, a nep lo hle.

Dembele leh a pu!
Athletic Bilbao coach hi Barcelona boss hlui Ernesto Valverde a ni a, Spanish coach hian Bilbao aṭang hian May 2017 khan Barca hi a pan a, January 2020-a ban a nih thlengin a enkawl.

Valverde hian Barca hi La Liga nomawi vawi hnih a chawipui hman a, Copa del Rey leh Supercopa de Espana-ah nomawi a chawipui ve ve bawk. A hun laiin sawisel tawk nasa mah se a hnua Barca talbuaizia thlirin, coach ṭha a ni tih hai rual a ni lo.

Tun season ṭan dawnah Bilbao enkawl hna a thawk ṭan leh a, a club hlui khelmuala a len zanah a chungah zahngaihna lantir a ni lo - a bik takin August 2017-a Barca-a a seng luh Dembele-a'n a pu hlui chungah zahngaihna a lantir lo.

First half-a goal khat leh assist vawi hnih neitu hian minute 73-naah Torres-a khung tur a siamsak leh a, 4-0 in a team a chakpui a, goal liah a inrawlh vek bawk tihna a ni - a thawk ṭha hle.

Atletico beiseina
Beisei anga season bul ṭan lo Atletico Madrid-in champion an la beisei ve reng tih an pholang a, Barcelona aṭanga a ngheta an lakluh hlim Griezmann chu Atletico beiseina siamsaktu a ni.

First half-ah team pahnihin goal an khung lo a, second half ṭantirah Betis tan Luiz Henrique chuan goal a khungah inngai mah se goal khung nana thawhhlawk Borja Iglesias chu a offside a, video assistant referee hmanga ennawn a nih hnuah pawm a ni lo.

Minute 54-naah Griezmann a inlar zui a, corner aṭangin a pet goal - goalkeeper Rui Silva dan theih loh chu centre back Germán Pezzella-a'n a dang thei bik lo a, a goal. Griezmann-a'n a duhtawk mai lo - minute 71-naah mawi zeta ball an inpek kual hnuah a hmawr a bawk a, a goal hnihna a khung.

Betis tan Fekir chuan minute 84-naah freekick aṭangin mawi zetin khung ve leh mah se an goal khung a tlai hret a, an tho thei tawh lo - pathumnaah Atletico an invawrh chho a, champion an la beisei ngam.