AS Roma ngamtu Napoli

Serie A hmahruaitu Napoli chuan Victor Osimhen-a goal khat hmangin AS Roma chu 1-0 in an hneh a, match 11 aṭanga point 29 hmuin, Italian football inelna sang berah an dinhmun a sawhnghet leh ta.

Pathianni zan inkhelah goal kan hmu har hle, hun tawp hma minute 10 chauh awm tawhah Nigerian striker Osimhen chuan Roma defender Chris Smalling a paltlang a, angle zim deuh tak aṭangin keeper Rui Patricio dan theih lohin a khung.

September 7 khan Liverpool nen an inkhelh ṭumin Osimhen hi a hliam a, tunah chuan a dam chiang leh ta, tun hnaiah goal thum a khung leh ta der mai. A striker ṭhain ngai a awh chho leh ta hi Luciano Spalletti tan chuan a lawmawm khawp ang.

Napoli hian penalty pawh an hlawh teuh hle, keeper Patricio-a'n Tanguy Ndombele a tih tluk vangin first half-ah penalty a chawi. Mahse, video assistant referee (VAR) hmanga an endik hnuah penalty hi an hnawlsak leh ta zawk a ni.

European league lian panga zingah - Napoli, Real Madrid leh Paris St-Germain te chauh hi, tun season league match bika tlawm la nei lo an ni. Napoli hi anmahni hmaih bertu, champion lai ni bawk Milan aiin point thumin an sang mek.

Jose Mourinho naute erawh an goal nawr a na tawk lo, minute 90 chhungin target zawna pet pawh an nei lo. Point 22 neiin Serie A table-ah pangana dinhmun an luah chhunzawm a, champion erawh an la beisei ngam zel.