Chawlh zai rel lo Max Verstappen

Max Verstappen chuan Formula 1 champion a nih hnuah pawh a la duh tawk mai lo, a chak ber nih tumin thapui a la thawh chhunzawm zel. Pathianni zana tlan zawh tak United States Grand Prix-ah Max hi a tlan chak leh ber a ni.

Circuit of the Americas-ah Verstappen a tlan ṭha viau a, mahse pit stop a hman hnuhnung berah Lewis Hamilton chuan a rawn tlan pel. Mercedes driver hian tun season kal laia a vawi khat nan hnehna a chang ngei dawn ni pawhin a lang hman.

Mahse, lap ruk chauh tlan tur awm tawhah Verstappen chuan Hamilton hi a rawn tlan pel leh ta tho a, kumina a vawi 13 nan hnehna a chang. F1 season khata chak hnem ber Michael Schumacher leh Sebastian Vettel te a nihrual.

Season tawp hmain Mexican, Brazilian leh Abu Dhabi Grand Prix te an la tlan dawn a, Red Bull driver hian record thar siam theihna remchang a nei a, a siam theih ngei pawh a rinawm hle a ni.

Verstappen-a'n hnehna a chan rual hian Red Bull chuan team champion an nihna an nemnghet, kum 2013 hnua an champion lehna hmasa a ni. Tun hnaia rorel ngar ngartu Mercedes tan chuan thu hriat nuam a ni lo ang.

Red Bull team boss Christian Horner chuan, "Max Verstappen world champion a ni a, team pawh khawvel champion kan ni bawk. Engkim hi lawmna tur hlir a ni. Kan hnehna chan hi Dietrich Mateschitz tan kan hlan," a ti.

Intlansiak neih hmain Red Bull din chhuaktu leh team neitu zinga mi Dietrich Mateschitz a thi a, hnehna a chan hnuah Max pawhin a hnehna chan chu Austrian billionaire thi ta Dietrich tan a hlan ve bawk.

Red Bull an chet fuh laiin Mercedes an che fuh lo a, team championship lamah pawh pathumna dinhmun an luah. An chungah Ferrari leh champion Red Bull te an awm a, season tharah chuan insiamṭhat ngei an tum ang.

World champion vawi sarih ni tawh Hamilton chuan, "Ka la beidawng ve lo. Mercedes hian car ṭha an rawn chhawp chhuak ang a, ropui takin kan la tho chhuak leh ngei ang," tiin a sawi a, kum 37 mi ni tawh mah se season tharah a hmel kan la hmuh ngei a rinawm.

Britain tlangval Hamilton hian F1 a luhchilh chinah, season khatah ṭum khat tal hnehna a chang ziah. Tun season erawh a la chak ve miah lo, intlansiak hmabak pathum an la neihah hian hnehna chan a tum ruh khawp ang.