Man City defender Walker a ṭawng chhuak

Manchester City leh England defender Kyle Walker chu 'social distancing' dan a bawhchhiat thu an tarlan nawn leh tak avangin a rilru na a ṭawng chhuak a, a nitin nun an zar buai nasa mah mahah a ngaih thu a sawi.

April thlatir khan Walker chuan mipuite chu Covid-19 laka him nan ina tawm im turin a ngen a, amaherawhchu amah hian in lamah a kawppui ni lo hmeichhe pahnih a inah a hruai.

Manchester City-in thuchhuah an siam a, Walker-a'n mipui entawn a nihna anga a mawhphurhna a hlen lo tih an sawi a, an hrem tur thu an sawi rualin mipui lakah ngaihdam an dil.

The Sun chanchinbu chuan Walker hian tun kar chhungin darkar 24 lekah 'social distancing' dan vawi thum a bawhchhiat thu an tarlang a; a unaunu leh a chhungte a tlawh bakah a ṭhiante nen cycle an khalhho thu an ziak.

Kum 29 mi Walker chuan twitter-ah a ngaihdan a sawi chhuak a, a chanchin an ziah duh avangin an en zui dan chu uchuak a tih thu a sawi chhuak.

Man City defender Walker chuan, "Hun harsa tak ka paltlang a, ka thiam loh liau liau a nih avangin mawhphurhna zawng zawng pawh ka la tur a ni. Chutihrualin tunah erawh ka nunah midang an inrawlh nasa mah mahah ka ngai. 

"Keimah chauh min nghawng lo a, ka chhungte leh ka fate hriselna thlengin a nghawng. Mihring ve tho ka ni a, na thei ka ni a, ngui ve thei tho ka ni. Mi hriat hlawh ka nih avangin hetiang zawng zawng hi ka neih loh phah lo.

"Chhan pawimawh nei loin ka nunah an inrawlh a, mipui tam tak ka chungah an thinrim. Chutihrualin tun ai hian ka nun hi hrechiang lehzual turin ka ngen a che u," tiin a lungawi loh thu a sawi.

Walker hian a thuziahah hian a unaunu hi brithday card leh thilpek pe turin a hmuh thu a sawi a, hun harsa a tawh lai pawha a hmangaih reng tih lantir nan a unaunu hian a kuah thu a sawi. Chutihrualin ei leh in lamin a nu leh pa te ina kal a nih thu a sawi lang a, a chhungte nen lehzel an bawhzui hi a hrethiam lo a ni.

Chanchinbu lamin Walker hian 'social distancing' dan a bawhchhe nawn tih tarlang mah se Manchester City chuan an defender hi an hrethiam a, a chungah hremna an lekkawh dawn lo.

•    Everton striker Moise Kean chu 'party' neihna hmuna video-ah a lan avangin club-in an hrem dawn.

•    Aston Villa captain Jack Grealish chuan a ṭhianpa tlawh tuma a chhuah ṭumin a lirthei khalh a chesual a. English midfielder hian ngaihdam a dil a, a zah thu a sawi lang tel bawk.

•    Tottenham player pahnih Serge Aurier leh Moussa Sissoko ten coronavirus vanga dan siam bawhchhiaa training an neih dun avangin ngaihdam an dil.

•    Spurs manager Jose Mourinho chu midfielder Tanguy Ndombele nen an training dun lai thlalak a chhuak a, Portuguese manager hian dan a bawhchhia tih pawmin hremna a hmachhawn.

•    Alexandre Lacazette, David Luiz, Nicolas Pepe leh Granit Xhaka te a huhoin thla an la a, Arsenal-in a hran ṭheuhin an zilh.

•    Chelsea midfielder Mason Mount chu Covid-19 a vei tih hmuhchhuah a nih avangin ni 14 inkhung hrang tura tih a ni a, heti chung hian West Ham midfielder Declan Rice nen an ball an pet dun lai thlalak a darh.