Paris khawpuiah Nadal a kir dawn

Rafael Nadal chuan tournament a khel leh thei tawh dawn. Kar leh chhunga khelh tur Paris Masters-ah Nadal hi a inlan dawn niin a coach Carlos Moya chuan a sawi, season tawp ṭha taka khar theihna remchang a ni ang.

Nadal hi kuminah hliamin a tibuai viau, a vawi 14 nan French Open nomawi chu a chawi tho a, mahse Wimbledon semifinal hial thleng mah se a dul hliam vangin a inkhel thei lo. September thla khan US Open a khel a, a hnu lamah inelna a la hmachhawn leh lo.

Coach Moya chuan, "Turin khawpuia ATP Finals khelh hmain inelna hmachhawn a ngai, chumi tur chuan Paris-ah a inkhel ang. Rafa hi chu a ṭha ber nih tuma bei reng mi a ni a, chuvangin hliam damkawr ni mah se a lakah beiseina kan nei sang," tiin a sawi.

Nadal hian Grand Slam nomawi 22 a chawi tawh a, ani aia chawi hnem an awm lo. October khan a nupui Mery Perello nen an fa hmasa ber an nei a, fa an neih vang hian a inkhelh leh hun tawp pawh a ti tlai hret nia sawi a awm bawk.

Duhthusama ṭhain season hmang lo mah se ATP Finals atan chuan a tling tawh a, a thiam zual pariat inelnaa che ṭha tur chuan match fitness neih a ngai, chumi tur chuan tournament khelh hmasak hi tih makmawh a ni.