World Cup beiseitu Hazard

Belgium captain Eden Hazard chuan Qatar World Cup chu an ram tan hun ṭha a nih a beisei thu a sawi a, chhuan duhawm bik (golden genaration) an neihte tana hun hnuhnung a nih a rinawm ta bawk.

Hazard hi kum 31 mi a ni tawh, tun dinhmunah chuan Spanish club ṭha Real Madrid tan hmun pawimawh a chang phak lo. Chelsea forward hlui hi an ram tan erawh chuan innghahna leh rinrawl a la ni reng thung.

Beisei an neih thu sawiin Hazard chuan, "Thil tum sang tak kan nei tur a ni, kum 2018 aia ṭha khan kan khel tur a ni ang. Inelna a hautak dawn tih chu kan hria, mahse chumi tur chuan inbuatsaihna pawh kan nei dawn a ni," tiin a sawi.

Qatar World Cup hi Hazard tan World Cup vawi thumna a ni dawn. Ani bakah hian Red Devils hian Thibaut Courtois, Kevin De Bruyne leh Romelu Lukaku te an nei, anni hian vanglai an hmang ve bawk.

An player neih dan chhut chuan Belgium hi champion tura rinkai an ni ṭhin, mahse beisei phak loin an zinkawng a tawp leh mai ṭhin. Anni ho tan chuan kumin hi hun ṭha hnuhnung a ni thei tawh ang.