EPL-ah Unai Emery kir leh ta
Aston Villa chuan an manager thar atan Unai Emery an lalut tih an puang a, an ban tak Steven Gerrard hmun ruak a luah dawn. A contract rei zawng tarlan a la ni lo - November aṭangin Villa enkawl hna hi a thawk ṭan ang.
Spanish manager hi Villarreal enkawltu a ni mek a, la chhuak turin Villa hian La Liga club hnenah pound maktaduai 5.2 an pe. Tun kar tawpa Villa match chu manager lailawk Aaron Danks-a'n a la enkawl rih ang.
Premier League club Villa chuan thuchhuah siamin, "Aston Villa chuan Unai Emery chu kan head coach thar a ni tih kan puang. Unai hian British rama hna thawk turin tih fel ngai a la nei a, chumi hnu November 1 aṭangin team a kaihruai ang.
"Manager tawnhriat nei ṭha, match 900 chuang team kaihruai tawh a ni. Tuna a club enkawl lai bakah Arsenal pawh a kaihruai tawh a, tun hmain Sevilla leh Paris St-Germain te nomawi a chawipui bawk," tiin an manager thar lakah beisei an nei sang.
Kum 50 mi Emery hian Premier League-ah tawnhriat a nei ṭha. Arsene Wenger a chhuah khan Gunners enkawl tura lakluh a ni a, mahse North London club hi thla 18 chhung chauh a enkawl hman tihah an ban.
Arsenal hian ban mah se hnathawh tur erawh a haihchham lem lo. Villarreal a enkawl a, Spanish club hi match 18 chhung tlawm nei loin a kaltluanpui a, club record thar an siam hial.
Villarreal hi Europa League final a luh pui a, inelna a hmachhawn thiam tak maiah hian Manchester United hnehin nomawi an chawi - European football inelna sang pahnihnaah hian tun hmain Sevilla chu vawi thum a champion pui tawh bawk.
Newcastle United-in mana-ger thar an zawn lai khan Emery hming hi a ri ring, mahse khawthlang media lamin an tarlan dan chuan Emery hian Magpies sawmna a hi hnawl - a hnar chhan tak tarlan ni lo mah se, thuneihna an tiam tel tam loh vang nia ngaih a ni.
Villa hian player langsar tak tak an nei, bazarah pawisa hman tur an nei ṭhin bawk. Philippe Coutinho, Danny Ings, Ollie Watkins leh Emiliano Buendía te an nei. Emery-a'n a remkhawm fuh a nih chuan hmatawng hlauhawm tak an ni thei ang.