Venghnuai aia ṭha zawk AFC

Honda MPL9-ah Aizawl FC-in FC Venghnuai hneh nawn turin penalty tho an mamawh a, amaherawhchu tun ṭuma I League club chak dan erawh sawisel bo a ni thung. Standly Rosario hote hian Lalchhawnkima penalty leh Lalthankima goal mawi hmangin Venghnuai hi 2-0 in an hneh.

Venghnuai defender Lalnunzira Hnamte-in tauh tur ang takin goalline aṭangin ball a beng chhuak a, referee-in thutlukna dik siam turin assistant referee leh fourth official te a rawn a, Zira hi a hnawhchhuah bakah AFC penalty a pe. Inkhelh hmasak ṭuma ṭum hnih penalty khungtu Chhawnkima'n minute 25-naah penalty hi a khung a, I League club hian inkhel thunun thei bik loin goal hnihna hi minute 90-naah Tha Thana'n hla tak aṭangin Venghnuai keeper R. Malsawmkima a pet khum.

Aizawl FC tlarhnung ti nghet ṭhatu Lalmuanmawa (Munez) chu man of the match-a thlan niin vei lam kila dah Lalmalsawma (Buanga) pawh a match hmasa berah a khel ṭha hle. AFC hian point 22 an hmuh tak avangin point hmuh belh lo mah se semifinal an thlen ngei a rinawm a, amaherawhchu I League club hi semifinal thlen ringawta lawm chi an ni lo.