Police an ropui, Chanmari an buai

Honda MPL9-ah Mizoram Police-in champion zia an chhuah a, nimin chhun khan Chanmari FC chu 6-1 zetin an sawp. Coach Lalbiaksanga Colney hote palina aṭangin pahnihnaa an invawrh chho a, point dinhmun thlir loa Chanmari laka an goal khung zat thlir chuan semifinal an khelh ngei a rinawm hle.

Chanmari FC erawhin coach Rochhingpuia an chhuahtir hnuah result ṭha neih an harsat a, coach thar K. Malsawmkima hnuaiah match thum khel tawhin point khat chauh an la hmu a ni.

Police an ropui
Inkhelh ṭan hmaa coach BS-a Colney sawi chu an dam kim thu a ni a, tlarhmaah Malsawmfela leh F. Lalrinpuia te inkawpin vei lamah captain Lalfakzuala a awm. Lalbiakhlua (Biaktea) chu bench-ah awm loin bul ṭan phei se chuan tun hma Police ang chauh ni loin tun hma Mizoram team tlarhma ang mai kha an ni dawn.

Chanmari FC-in an intawn hmasak ṭumin ṭan phat aṭangin na takin an nawr a, tun ṭumah pawh an tum dan a la ngai reng. Amaherawhchu minute thumna lekah R. Malsawmtluanga ball pek chu Fakzuala'n cool takin a khung a, Police-in an chance hmasa ber an khung avangin an dinhmun a ṭhat phah.

Mala nauten nawr chhunzawm mah se goal hmaah an hriam tawk lo a, striker Lalhriatpuia'n pass hunah shot a thlang a, tlarhma dangte pawh an finishing a ṭha chuang lo. First half-ah goal khat chauh a luh avangin Chanmari lamin beiseina an nei zel.

Second half-ah Police bawkin bul an ṭan ṭha a, minute 53-naah corner kick aṭanga ball kal chu Sawmfela'n tauhin Chanmari defender Benjamin J. Lalrinliana a insiamrem hman loh avangin goal-ah a lut.

Team pahnihin substitution an siam ve ve a, BS-a Colney-in a siam fuh zawk. Minute 58-naah Biaktea shot chu Chanmari keeper Lalhruaitluanga'n dang mah se Sawmfela'n a per chu goal-ah a chantir. Chanmari an insiamṭha thei lo a, minute thum hnuah Sawmfela ball pek chu Laldawngliana Colney-in awlsam takin goal-ah a chantir.

Chanmari FC mualpho lutuk tur hliah khuh nan substitute Lalnunzira Sailo-in minute 75-naah siphurh a sut ṭhen a, amaherawhchu Police substitute Lalnunsanga'n (Talea) goal hnih a rawn khung belh. Police-in goal ruk an khung a, Chanmarians-in goal khat chauha an chhanlet avangin an mualpho hle.

Engtin zel?
Mizoram Police hian Aizawl FC an hmachhawn lehnghal dawn a, hmabak harsa viau mah se Chanmari an sawp avangin inrintawkna nasa tak an nei ang. Police coach BS-a Colney chuan, "Training-na angin kan khel chhuak thei a, ka naute khelh danah ka lawm hle. Khatianga ṭha khan khelh chhunzawm zel kan tum ang," tiin Vanglaini a hrilh.

Chanmari coach Mala chuan, "Khatiang zat zat kan chhuah ka ring lo. Goal pawh kan nawr na zawk a, mah se goal kan khung thei lo a, kan tlarhnung a pawp bawk. Tunah chuan chak loh a thiang tawh lo," tiin an insiamṭhat theih a rinthu a sawi bawk.