Sawi hlawh takin West Ham an chak

West Ham United chuan Kurt Zouma-a goal sawi hlawh tak leh, hun tawp dawna Said Benrahma-a penalty hmangin AFC Bournemouth 2-0 in an hneh a, anmahni mualah point thum hlu tak an hlawh chhuak.

Thawhṭanni zan London Stadium-a inkhelah goal kan hmu mai lo, half time thlen hma deuhin defender Zouma chuan a tauh lut. Zouma-a'n ball a tauh hma hian Hammers defender pakhat zawk Thilo Kehrer chuan a kutin a lo khawih fuh ngei niin a lang.

Thil thleng hi video assistant referee (VAR) hmanga ennawn a ni a, an pawmsak. Mualneitu lam hian hun tawp dawnah Jordan Zemura-a hand ball vangin penalty an chawi ve thung a, a pettu Benrahma chuan a khung chiang hle.

Bournemouth lam tan result ṭha lo a ni, an chak loh bakah striker Dominic Solanke leh goalkeeper Neto te chu hliam vanga lak chhuah an ngai, manager lailawk Gary O'Neil tan chuan a luhai thlak ang - match thum chhung chak ni hmel an hmu ta lo.

Referee David Coote thutlukna chungchang sawiin O'Neil chuan, "Kehrer khan chiang takin a kutin a khawih, goal kha pawm loh tur a ni, thudik chu mipui pawhin an hmu vek, thutlukna dik lo tuartu kan ni hi a pawi," tiin a sawi.

Inkhelh banah West Ham manager David Moyes chu thil thleng chungchang zawh a ni a; Moyes chuan, "Goal hmasa leh a hnuhnung kha ka la ennawn ve lo, ka sawi theih awmchhun chu hnehna chan phu khawpin kan khel," tiin a sawi ve thung.

Hammers hian Premier League match 12 aṭangin point 14 an hmu a, table-ah 10-na dinhmun an luah. Chak lo Bournemouth erawhin point 13 an nei thung a, an inthlauhna hi point khat chauh a la nih avangin an dinhmun a la danglam leh vat thei.