Tennis ka la chawlhsan lo - Serena

Serena Williams chuan tennis a la chawlhsan loh thu a sawi. Amercian tennis star hian tun season tawp hunah inkhelh chawlhsan a tum thu a sawi tawh a, an rama inelna lian US Open an khelh zawh khan media tam takin an thlah der tawh.

Mahse, tun hnaiah Serena a rawn ṭawng chhuak. Grand Slam vawi 23 champion tawh chuan, "Ka la chawl lo, tennis khel tura ka lo kir leh theihna kawng a inhawng zau hle, kan chenna inah pawh tennis court ka nei thlap.

"Zing ka thawh hian thil thui tak ka ngaihtuah ṭhin, tournament khel loa ka hun a liam mai tur hi ka ngaingam lo ṭhin a, mahse a nihna tak sawi chuan inkhel loa awm tawp chu harsa ka la ti a, nunphung hi a la inbuk tawk thei lo," tiin a sawi.

Tennis season kal lai a la zo lo a, a duh a nih chuan a la inkhel leh nghal thei reng. Mahse, fa a nei tawh a, kum 41 mi a ni tawh bawk avangin a vanglai a liam tawh, inkhel leh pawh ni se tun hma chu a phak thei tawh dawn lo.

Open Era china Grand Slam champion hnem ber chu Margaret Court (24 titles) a ni a, champion hnem lamah Serena hian nomawi pakhatin a phak lo. American star hian record thar siam theihna remchang pawh a nei nual, mahse major tournament final a khelh hnuhnung pathumah a chak lo.