Liverpool tan draw a tawk; chak mamawh Spurs
Zaninah Champions League inkhel hmuhnawm a awm nual dawn - Liverpool chuan zan dar 12:30-ah Ajax an lenchilh dawn a, Reds tan last 16 lut turin draw result neih a tawk.
Mahse, Jurgen Klopp-a team hian group hmahruaitu ni chung ngeia last 16 luh an duh chuan chak an mamawh a, zanin dar 12:30-a Rangers mikhual tur Napoli chu point thumin an phak lo mek - match hnih chiah khelh tur a awm tawh.
Tottenham Hotspur chu zanin dar 12:30-ah vek an inlan dawn bawk a, anni hian Sporting Lisbon an mikhual ang - Spurs hian hnehna an chan chuan match khat khelh tur la nei chungin knockout round an lut ang.
Spurs hian hnehna an chan chuan Marseille an pui nghal thei. Group D inkhel dangah Marseille hian zanin dar 12:30-ah vek Eintracht Frankfurt an lenchilh dawn a, Spurs an chak a, anmahni an chak bawk chuan an tlang ang - head-to-head ah Sporting aia an chungnun vang a ni.
Harh a hun e
Liverpool-in season an hmang fuh lo tih hi tlang hriat a ni a, Manchester City leh West Ham a zawna an hneh avanga an phur viau hnuah Nottingham Forest lakah an tlawm leh ringawt a nih kha - Reds fan-te rilru na thawidam nan zaninah chak a ṭul.
Mahse, Liverpool tan chuti maia awlsam erawh a ni dawn lo. Ajax hian an league match hnuhnung pahnihah goal 11 ngawt an khung a, an lamah goal hnih chiah a lut - league match 11-ah vawi khat chiah la tlawmin, hma an hruai mek.
Dutch club hian mikhual team lakah mualpho an duh dawn lo tih a chiang a, mahse, last 16 luh beiseina nei turin Liverpool lakah si khat aia tam tala chak an an mamawh.
Ajax tan chak turin tun season-a goal 10 khung tawh Steven Bergwijn leh goal kua khung tawh Mohammed Kudus an pawimawh dawn a, Virgil van Dijk hoin Reds tlarhnung tan fimkhur a ṭul ang - Dusan Tadic a la awm bawk.
Liverpool dinhmun
Reds tlarhnungah Joel Matip a la inhliam a, Ibrahima Konate-a'n training zawm tawh mah se inlan tur chuan a la hma hretin a rinawm - chuti a nih chuan VVD chu Joe Gomez-a'n a dinpui tura ngaih a ni a, full back-ah Trent Alexander-Arnold leh Andy Robertson an awm bawk.
Forest lakah Jordan Henderson chu bench-a dah a ni a, Ajax tan Klopp-a'n a khek niin a lang - zaninah Fabinho dinpui thei tura ngaih a ni a, damlohna avanga Forest laka inlan lo Thiago Alcantara pawh lo kir tawh tura beisei a ni.
Tlarhmaah Luis Diaz leh Diogo Jota awm lo mah se Darwin Nunez a dam leh tawh a, Mohamed Salah leh Roberto Firmino an la awm bawk avangin Ajax tlarhnung chhaih buai tur chuan an la ṭha tawk.
Liverpool keeper Alisson tan Reds jersey ha chunga vawi 200 a inlanna tur a ni dawn a, Brazilian goalkeeper ṭha bik hian hnehna chang ngei chuanga a match pawimawh hi lawm a duh ang.
Chak mamawh Spurs
Spurs-in season bul an ṭan ṭha viau a, mahse, beisei angin thil a kal reng bik lo - Antonio Conte enkawl team hi an league match hnuhnung pahnihah an tlawm a, Italian coach-in Premier League nomawi beisei tura sum leh hun an mamawh thu a sawi leh tawh!
Zaninah an tihsualte siamrem a, fan-te lawmna thlen turin hun ṭha an nei dawn a, mahse, an ṭhat dan berin an inlan thei dawn lo - Dejan Kulusevski leh Richarlison chu hliam vanga inlan thei lo tur chiang an ni.
Mahse, Spurs hian Harry Kane leh Son Heung-min an neih miau avangin Sporting Lisbon tlarhnung su hawng tur chu an nei ṭha tawk a, fans tan lungphan lutukna tur a ni lo.
Hriat tel tur chu Spurs hian zaninah hnehna chang zo lo pawh ni se, an hnuai chiaha awm Marseille an la hmachhawn leh dawn a, knockout round lut turin chance an la nei leh ang.