Barcelona dinhmun a ṭha lo

Hmana an ropuina ang neih let tuma, nipui transfer-a leiba tam tak nei chunga 'risk' la Barcelona chu Champions League aṭanga tla thei dinhmunah an ding mek - zanin dar 12:30 hian Bayern Munich an hmachhawn dawn.

Barcelona tan last 16 lut turin tlawm a thiang tawh lo a, mahse, an inkhelh hma hauha tla thei dinhmunah an ding lawi si - group C aṭangin zanina Barca hmachhawn tur Bayern Munich chu tling chiang an ni a, an hnuai chiahah Inter Milan an awm.

Inter hian zanin dar 10:15-ah Viktoria Plzen an hmachhawn dawn a, an chak chuan point 10 an nei tling chiah dawn - Barca hi an hmabak match hnihah chak pawh ni se point 10 aia sang an hmu thei lo a, head-to-head ah Inter an tluk lo bawk.

Chumi awmzia chu, Inter hian Viktoria an hneh chuan Barca tan last 16 luh ngaihna a awm tawh lo tihna a ni a, hei vang hian Inter result-in Barca game pawimawh leh pawimawh lohna a hril thui hle.

Spanish club langsar Atletico Madrid chuan zanin dar 12:30-ah Bayer Leverkusen an mikhual dawn bawk - Diego Simeone-a enkawl team tan tlang turin chak ngei ngei a ngai tawh.

Group B aṭang hian Club Brugge an tlang tawh - anni hian zanin dar 10:15-ah FC Porto an mikhual dawn a, Portuguese club hian hnehna an chan a, Atletico an tlawm bawk chuan Porto an tlang ang.