FCB leh Chhingcows tan chak a ṭul

Zote Hona MPL9-ah vawiin chhun dar 12:00 hian FC Bethlehem leh Chhinga Veng FC te an inkhel dawn.

MPL kai thar Bethlehem hian Mizorama football inelna sang ber khelh chhunzawm turin chak an mamawh a, Chhingcows tan semifinal khel turin chak a ngai ve bawk.

FCB coach Victor Lalbiak-mawia chuan, "Chak tumin bul kan ṭan ang a, inkhel awm dan kan zir chiang ang. Chak a pawimawh a, draw a pawi lo a, chak loh erawh a pawi. Ka nauten an tihtur ṭheuh an tih a pawimawh hle," tiin Vanglaini a hrilh.

Bethlehem hian goal khung an awlsam a, goal chhuah pawh an awlsam - season tir aṭangin an la ngai reng. Chhing Veng lakah hian FCB captain Sena Ralte a la khel thei dawn lo a, player dang an dam kim avangin Chhingcows laka point hmu thei tur an la awm.

October 15, Inrinnia an inkhelhna thlir chuan team pahnih hi 0-0 in an hnehtawk a, Bethlehem an khelh ṭhat zawk avangin Chhingcows tan insiamṭhat a ṭul hle.

Bethlehem laka point khat an hlawhchhuah hnuah Chhinga Veng hian Chawnpui an hneh lo a, semifinal khelh an duh a nih chuan chak ngei a ṭul a ni.

Chhingcows coach Anand Gurung chuan, "Kan intum hmasak zawk kha chuan kan game plan-ah player-te an chiang lo a, kan tisual a ni. Match hnuhnung bera kan tlawm chhan erawh kan defender-te kim loh vang a ni thung. Tun ṭumah erawh chhuanlam a awm tawh lo ang," tiin a sawi.

Chhinga Veng tan Khawzawla red card hmu Abel Lalruatfela a rawn kir tawh dawn a, a kawppui Lalbiakhlua a dam tawh bawk. Defender lai pahnih hian team-ah phurna a pe dawn a, midfielder tawnhriat nei ṭha Lalengzama Vangchhia te fitness a ṭhat tawh bawk avangin chak beiseina an nei sang khawp ang.