Table mawngphah aṭanga chhuah theihna hun ṭha - EFC coach

Honda MPL9-ah vawiin tlai dar 3:00 hian RG Stadium-ah Electric Vengin Chawnpui FC an hmachhawn dawn.

EFC coach Lalrem-tluanga (RT-a) chuan, "Table mawngphah aṭanga chhuah theihna hun ṭha," tiin a sawi a, hnehna chan a inbeisei.

Electric Veng hian match hnuhnung berah an elpui FC Bethlehem an hmachhawn a, 3-1 in hnufual mah se player 10-a khel chungin an tho chhuak. Kim loa khel chungin RT-a hote an khel ṭha a, a tawpah phei chuan chak thei dinhmunah a ding hial.

EFC hian hrem vangin midfielder Vanlalrem-kima (Tetea) an chhawr thei dawn lo a, FCB leh Chawnpui laka a chetmawi loh avangin match thum atan hrem a ni.

Coach RT-a chuan, "Ṭawngkam vanga red card pek nghal hi chu ka hrethiam lo. Tetea ṭawngkam aṭangin ka pawm lo lehzual a, yellow card an pe phawt tur a ni," tiin a lungawi loh thu a sawi lang.

An khingpui tur Chawnpui chungchang sawi zuiin RT-a chuan, "MPL-a Mizo coach record nei ṭha ber enkawl club an ni a, a harsa dawn. Mahse, kan chak thei tih kan hria a, chak pawh kan tum ang. Kan vanneihna chu tun round-a match hnuhnung berah midang result hre sain kan khel dawn," tiin Vanglaini a hrilh.

Chawnpui leh Electric Veng hi round 6-ah khan an inhmachhawn a, coach Lalsangzuala Hmar hote 2-1 in an chak.

Chawnpui hian match hnuhnung pathumah Chanmari, Electric Veng leh Chhinga Veng lakah hnehna an chang vek a, inrintawkna pawh an nei sang hle.

Chhinga Veng leh Chanmari champion puitawhtu coach Sanga chuan, "MPL harsatzia kan hre vek. Tunah hian a sang pali zingah pawh a awm mah ila kan chetsual chuan panganaa tla nghal thei kan ni. Electric Veng nen kan inkhelh hmasak zawk khan a vannei zawkah kan ṭang a, inchhuang thei kan ni lo - chak leh chak loh chu sawi lawk theih a ni lo," tiin Vanglaini a hrilh.