Venghnuai aia ṭha zawk AFC Semi final rim an nam ta
Honda MPL9-ah Aizawl FC-in FC Venghnuai hneh nawn turin penalty tho an mamawh a, amaherawhchu tun ṭuma I League club chak dan erawh sawisel bo a ni thung.
Nimin tlaia RG Stadium-a inkhelah Standly Rosario hote hian Lalchhawnkima penalty leh Lalthankima goal mawi hmangin Venghnuai hi 2-0 in an hneh a, semi final an hnaih sawt hle.
Red card leh penalty
Venghnuai defender Lalnunzira Hnamte-in tauh tur ang takin goalline aṭangin ball a beng chhuak a, referee-in thutlukna dik siam turin assistant referee leh fourth official te a rawn a, Zira hi a hnawhchhuah bakah AFC penalty a pe.
Team pahnih inkhelh hmasak ṭuma vawi hnih ngawt penalty khungtu Chhawnkima'n minute 25-naah penalty hi a thun - veteran defender Chhawnkima hian Venghnuai lakah tun season-ah penalty vawi thum ngawt a pet goal a ni.
Venghnuai an hnuai bik lo
Venghnuai hi an ṭang thei hle mai a, si phur zawk leh player nei tlem zawk ni chungin I League club hian inkhel thunun thei bik loin hun rei tak chu Aizawl FC hi ngaih ṭhain an awm thei lo a, Rindika naute'n an fight ṭha hle.
Goal hnihna hi minute 90-naah Tha-Thana'n hla tak aṭanga Venghnuai keeper R. Malsawmkima pet khumin a khung.
Aizawl FC tlarhnung tinghet ṭhatu Lalmuanmawa (Munez) chu man of the match-a thlan niin vei lam kila dah Lalmalsawma (Buanga) pawh a match hmasa berah a khel ṭha hle.
AFC hian point 22 an hmuh tak avangin point hmuh belh lo mah se semifinal an thlen ngei a rinawm a, amaherawhchu I League club hi semifinal thlen ringawta lawm chi an ni lo.
Aizawl FC 'thar' chu
Aizawl FC-in MPL-ah hma an hruai fal zel a, hei hi Aizawl FC team thar anga chhal ngam a ni.
MPL9 ṭan hmaa Inter Village Football aṭangin player ṭha langsar thar an lalut nual a, MPL chawlh laia club nei lo aṭangin player an lak bakah tawnhriat nei ṭha player an la khawm bawk.
MPL9-ah hian a tir lamah 'chak hram hram' hmangin bul an ṭan a, an khelh ṭhat loh zawk ni-ah pawh an vannei a, referee thutlukna an vanneihpui ṭum pawh a awm bawk a; nimahsela an chakna hnar erawh an squad chhah vang a ni.
MPL9-ah layer panga ngawt inthlak theih a nih tawh avangin bench aṭanga lut tur player ṭha hlang na la nei reng a, a bikin second half-ah an player neih ṭhat a lang chhuak ṭhin.
Team hmuhnawm leh attacking football khel an ni bik lo a; amaherawhchu midfield-ah an solid a, an goal an venghim ṭhain mamawh hunah goal an thun thei tlat zel a, chak an 'thiam' a ni ber - semi final an khelhna tur dâl theitu chu 'thilmak' chiah a ni ta!