Premier League Club Bihchianna Burnley - Mee, Barnes leh Wood

Burnley Football Club hi a tirah chuan Rugby Club Burnley Rovers tih ṭhin a ni a, May 18, 1882 khan football club-ah an inthlak. Kum 1888-a Football League din a nih khan member an ni nghal a, Premier League awm chinah club ropui tiha chhal tur ni lo mah se kum 1921 leh 1960 daih tawh khan league nomawi an chawi tawh a, FA Cup-ah pawh kum 1914 khan an champion tawh a ni.

Burnley hi an jersey rawng vangin Clarets tiin an ko ṭhin a, league ṭantirh hian team 12 an awm. Chungte chu Burnley bakah Preston North End, Aston Villa, Wolverhampton Wanderers, Blackburn Rovers, Bolton Wanderers, West Bromwich Albion, Accrington, Everton, Derby County, Notts County leh Stoke te an ni a, an record chu eng pawh ni se English club hlun tiin an sawi theih.

Clarets hian Jerry Dawson, Tom Boyle, Bob Kelly, Jimmy Adamson, Jimmy Mcllroy leh John Connelly te chu an player langsar a ni a, anni hi tun hmaa chet ṭhat puitute an ni. Premier League awm hnuah erawh Burnley an ropui chiam lo a, 2009-10 season khan a vawi nan an khel ve chauh. Season khat lek league sang ber an khelh hnuin an relegate nghal a, 2014-15 khan inpetling leh mah se season khat chauh an daih.

Championship-ah erawh Clarets an chungnung a, 2015–16 season-ah Burnley-in point 93 zet hmuin an champion a, Premier League khel tura tlingin tun thlengin an la inham tang. Tun season-ah pawh Clarets hian point 39 an hmu tawh a, Premier League an khelh zel a rinawm hle.

Burnley tana Premier League-a inlan hnem ber chu Benjamin Thomas Mee a ni a, kum 30 mi defender hi Manchester City academy aṭangin a inzir chhuak. 

Ben Mee hian September 21, 1989 khan Sale, Greater Manchester-ah a piang a, Manchester City academy tan captain armband hreng phain 2008 FA Youth Cup-ah a champion pui. City hian Mee hi kum hnih atan contract an ziahpui a, player manto zawk an lakluh nasat avangin khelhna hmun erawh chan a harsat.

Jersey number 41 hain League Cup-a City-in West Bromwich Albion an hmachhawn ṭumin a inlan a, khualmualah 2-1 in an chak lo. English defender hian inchher hriam tumin Leicester City leh Burnley te loan hmangin a zawm a, amaherawhchu Man City hotute hmin khawpin a che ṭha tawk lo. Chutihrualin Burnley tana khel turin a ṭha tawk a, Mee hian January 17, 2002 khan a nghetin Championship club hi a zawm.

Ben Mee hian Burnley tan hmun pawimawh chang chhoin 2013–14 season khan Championship-ah pahnihna a nih pui a, 2015–16 season-ah a champion pui leh bawk. Premier League-ah pawh Mee hian season tinin match 30 bawr vel a khel ṭhin a, chu chuan player pawimawh a nihzia a nemnghet.

Burnley tana Premier League-a goal khung tam ber Ashley Barnes-a'n goal 38 a khung a, Chris Wood-a'n goal 31 a khung ve bawk. Barnes hi Bath, England-ah October 30, 1989 khan a piang a, naupan lai chuan Bath Arsenal tan khelin a khelhpui zingah Scott Sinclair pawh a tel. Southern League aṭangin bul a ṭan a,  Paulton Rovers-ah a goal khung theih avangin hming a chher hle.

Kum 2007 khan Championship club Plymouth Argyle-ah a trial a, reserve team tan goal a khungsak nual. Intuai hriam turin Conference Premier club Oxford United, Salisbury City, Eastbourne Borough bakah League Two club Torquay United-ah te a khel kual a, hming a chher tawk lo. 

Plymouth Argyle-in Ashley Barnes-a theihna an hmu fuh lo a, 2009-10 season-ah loan hmang bawkin Brighton & Hove Albion-ah a kal a, Seagulls-in a theihna a hmu. English striker hi Brighton-in an la nghet a, hetihlaia League One club hi Championship khel turin a tlinpui a, kum 2013 khan Burnley a zawm. Clarets-in rinrawlah an hmang a, Barnes hian season sarih chhungin inelna hrang hrangah goal 43 a khungsak tawh a ni.

Barnes-a kawppui Chirs Wood erawh English mi a ni lo a, footballer ṭha bik chhuah zen zen lohna ram New Zealand aṭanga chawr chhuak a ni thung. Wood hi December 7, 1991 khan Auckland, New Zealand-ah a piang a, football ngaina chhungkua aṭangin a seilian. English striker farnu Chelsey Wood pawh inkhel thiam niin New Zealand U20 tan 2008 U20 Women's World Cup leh 2010 U20 Women's World Cup a khel a, a bialnu Kirsty Linnett pawh professional footballer a ni tho.

Wood hian an ram semi professional club Cambridge FC aṭanga bul ṭanin an hmelma Hamilton Wanderers a zawm leh a, an ram league sang bera khel Waikato FC tan a khel chho leh bawk. 

Waikato-a a awm lai hian West Bromwich Albion academy coach Roger Wilkinson-a'n a hmu fuh a, reserve team-a awm turin a la lut. Kum 2009 khan West Brom player eng emaw zat inhliam zarah khelhna hmun a chang a, April 2009 khan Baggies tan inlanin New Zealander zinga Premier League khel thei pangana a ni.

Kum 28 mi Wood hi Premier League khel reng tur erawhin a la ṭha tawk lo a, club hrang hrangah a kal kual a, Leicester City leh Leeds United-ah hming a chher lehzual. 

Leeds-a a khelh lai hian league match 83 aṭangin goal 41 a khung a, Premier League club Burnley-in tlarhma tih chak nan pound maktaduai 15-in an la lut. Wood hian a man phu khawpin Clarets tan a khel chhuak a, Premeir League season thum a khelh tawhah goal 10 a khung tling vek.