Chanmari FC-in semifinal an hnaih

Mizoram Premier League champion lai Chanmari FC-in nimin chhun inkhelah an elpui Bethlehem Vengthlang 3-0 in an hneh a, point 18 hmuin pahnihna dinhmun an sawhnghet.

Lammual inkhelah hian BVT defender MS Dawngzela'n an lamah a tilut a, second half-ah Vanlalbiaa Chhangte leh B. Zoramthara ten Chanmari tan goal an khung belh.

Foreigner tel loin
Bethlehem Vengthlang FC-in Mizo hlangin squad an din a, Chanmari FC-in Emmanuel Chijioke Igwebuik nei mah se Nigerian midfielder hi khelhna hun an siam lo.

Chanmari inkhel bul ṭantu zingah BVT aṭanga an lakluh B. Zoramthara'n bul a ṭan a, BVT lamah David Lalchhuanawma'n a club hlui hmachhawn turin bul a ṭan ve bawk.

A bul ṭanna
Team pahnihin an theihna zawng zawng an chhuah a, inkhel a hmuhnawm.

A tir lamah an inbei tawk viau a; minute 28-naah B. Thara freekick pet chu BVT defender MS Dawngzela'n (Notea) tibuaitu nei lo mah se an lamah a do goal.

BVT-in goal an chhuah hnuah an nawr let a, Laldinliana Varte ball pet chu goal ngei tura ngaih ni mah se Chanmari keeper F. Lalmuan­awma'n a dang hman a. Captain Rammawia ball petin crossbar a per a, goalline chhungah a lut lo.

First half tawp lamah Chanmari an talbuai a, goal chhuah loin an hmang tluan thei hram.

Minute li
Chanmari FC-in an forward inhliam Gani Ahammed an la chhuak a, Mizoram Police an hneh theihna atana player thawh hlawk MC Malsawmzuala luhtir a ni.

Siaha tlangval MC-a hian a theihna pholang nghalin minute 47-naah vei lam aṭangin vengtu nei lo Mabiaa a pe fuh chat a, Hriang­tlang tlangval hian a pet goal.

Minute hnih hnuah Mabiaa'n an lakluh hnuah a cross ball chuan David-a kut a per a, referee-in penalty spot a kawk. Veteran player Thara rawn pen chhuakin cool takin a club hlui lamah a khung.

Chanmari FC-in minute li chhungin goal hnih an khung a, first half-a goal khat an khung bawk avangin minute 50 a nih chuan chak tur a chiang.

A lut tawh lo
Bethlehem Veng­thlang lamin goal khung theihna tur an ngah a, captain Rammawia'n hun ṭha ṭum hnih a hlah.

Semifinal-ah CFC Chanmari FC-in point 18 an hmu a, match hnih chiah khelh tur a awm tawh.

H. Vanlalthlanga hote hian Ramhlun North leh Dinthar FC te an la khel dawn a, point an hmu lo a nih pawhin semifinal luh theih dan a awm tawh.

Chanmari coach Thlanga chuan, "Semifinal luh hrim hrim hi kan duh a, pahnihna emaw palina emaw pawh pawi kan ti lo," tiin knockout stage khelh ngei an tum thu a sawi.

BVT-in an elpui an hneh loh avangin semifinal kalkawng a bumboh sawt. Bethlehem VT hian hmahruaitu Chhinga Veng leh Chan­mari West an la hmachhawn ang.