India team enkawl tur Mapuia

FIBA World Cup qua­lifier khel turin India Senior Men's Basketball team chuan November 3 aṭangin Sree Kanteerava Indoor Stadium, Benga­luru-ah training an nei ṭan dawn - India team coa­ching pe tur chu Mizo tlangval H. Laldinsanga (Mapuia) a ni.

Saron Veng tlangval Mapuia hian nikum khan FIBA Coaching Cer­tification Course Level 3 a zo a, India ram pumah he course zo hi mi 10 chiah an la awm - North East aṭang chuan Mapuia chauh hi a la ni. Mapuia hian inelna takah India team a enkawl zui dawn leh dawn loh a la chiang lo, training a neih pui hnuah thutlukna la siam leh tur a ni ang.

Khatla TBL tana Mizoram Super League (MSL) nomawi vawi hnih chawi tawh Mapuia hi Mizo basketball player zingah India tana inlan thei hmasa ber khawpa thleng sang a ni a, coaching a luhchilh hnuah pawh Mizo ti hmingṭhatu a nih chhunzawm zel.

MSL season hmasa ber Most Valuable Player Mapuia chuan, "Lawm­thu sawina tur ka ngah a, mimal leh pawl hming lam sen a ni lo. Tun dinhmun ka thlen theih nana min hruaitu Pathian chungah ka lawm a, Mizo mipuite min ṭawngṭai pui zel turin ka sawm bawk," tiin Vanglaini a hrilh.

Mapuia hian vawiinah Aizawl a chhuahsan ang a, November 3, Zirtawpni zing dar 10 aṭangin Indian Senior Men's Basketball team a hrual ṭan dawn a ni.