Goal 7 luhnaah Police an chak hram

Nimin tlai Mizoram Premier League Season 6 inkhelah goal sarih a lut a, Mizoram Police-in Chanmari West 4-3 in an hneh.

Police hian point 17 hmuin pali­naah in­vawrh chho a, West Warrior erawh point 11 hmuin pasarihnaah an awm chhunzawm.

Jacob-a show

Shillong Lajong midfielder hlui Jacob Lalrawngbawla'n a thiamzia a pholang. Tlungvel tlangval Jacob-a hian minute ngana lekah a petna tur mawi taka a insiam hnuah goal-ah a pet a, Police keeper Andrew Lalhmingliana tihsual vangin a lut.

Police-in an nawr let nghal a, Dinthar aṭanga an lakluh Lal­biakhlua (Hlutea) chu a match hmasa berah a pawimawh nghal. Minute 12-naah Hlutea cross chu West Warrior defen­der Lalmawi­zuala'n clear a tumna lamah an lam goal kilah a pet lut.

Police an chungnung zui a, goal khung an harsat avangin West Warrior tan insiamṭhatna hun an siam. Tlungvel tlangval Jacob-a'n a ball pet thiamna hmangin Police tlarhnung tan harsatna a siam a, a ball pek ṭhat a ṭhianten khung thei lo mah se Shillong Lajong midfielder hlui hian minute 43-naah mawi zetin a pet goal - half time-ah 2-1 in Chanmari West an sang.

Ṭ-a ve thung

West Warrior midfielder Jacob-a u chu Police captain V. Lal­ṭan­puia a ni a, minute 60-naah Ṭ-a hian kawh zetin a pet goal a, an unau goal khung hi pui dun tak a ni.

Minute hnih hnuah Police-in hma an hruai zui a, Republic Veng tlangval F. Lalrinpuia'n freekick aṭangin a khung.

Fakzuala hun

Armed Veng tlangval Lalfak­zuala'n MPL6-ah goal nga khung tawh mah se nimin tlai inkhelah goal ngeina tura ngaihah ṭum nga vel zet a hlah.

Fakzuala chet fuh loh Chanmari West-in hmang ṭangkaiin subtititute Vanlalthlamuana shot-cross chu keeper Andrew-a'n man sualin goal line a pel hman - 3-3 a ni.

Police an mangang a, Fak­zual­a'n keeper Lalmalsawma chauh a hmachhawn hnuah a khung thei lo. Minute khat chiah a awm tawh tihin Fakzuala'n hnai tak aṭangin cross­bar a pet per a, Valpuia'n rawn tauh hmasa berin Fakzuala'n chakna goal atan a khung ta hram a ni.

Mizoram Police an vannei a, an point hmuh zat erawh point thum tho a nih avangin semifinal khel turin an dinhmun a ṭha hle.