Bayern assistant manager Klose

Miroslav Klose chu season thar aṭangin Bayern Munich assistant manager a ni dawn, German tana goal khung hnem ber hi manager Hansi Flick thachhang dawltu a ni ang.

Kum 41 mi Klose hi tun hnai kum hnih chhung chu Bayern under 17 coach a ni, tun season a zawh hunah chuan a kaisang dawn. Player a nih laia season li a hman tawhna Allianz Arena-ah hian a mikhual dawn lo.

Klose hian ram tan goal 71 a khung a, ani aia khung hnem an awm lo. World Cup 2014 khan an ram chu a champion pui, khatih lai khan Die Mannschaft enkawltu chu Joachim Low a ni a, assistant coach chu tuna Bayern enkawltu Flick hi a ni.

Hun a inher a, Flick-a'n Bayern Munich a kaihruai tawh, tunah chuan Flick hian player a nih laia a enkawl hman Klose chu a thawhpui dawn. Kaiserslautern, Werder Bremen leh Italian club Lazio tan pawha khel tawh Klose tan team puitling enkawl chungchangah chuan a tawnhriat hmasa ber tur a ni dawn.

Klose chuan, "Team enkawl chungchangah chuan ka tan hmabak thar a ni dawn. Ka phur a, ka hlimin ka nghakhlel tawh hle," a ti. German champion tan hian 2023 thleng daih contract a ziak

Bayern coach Flick chuan, "Player a nih laia a tawnhriat kha a tam, club leh ram tan sulhnu ṭha tak nei a ni a, coaching team tan Miroslav Klose hi mi pawimawh leh ṭangkai tak a nih ngei ka ring. Ram tan hlawhtlinna lian kan chang dun tawh, club lamah pawh hlimna kan hmuh ka beisei," a ti.

German Bundesliga hi hri leng vangin an chawl lailawk mek, May 16 aṭangin an khel chhunzawm leh ang. Champion lai Bayern hian point lia hma hruai fal mekin a zawnin a vawi riat nan league champion nih an tum mek.