Bayern Munich leh PSG an tlang

German champion Bayern Munich leh Paris St-Germain te chuan Group B aṭangin Cham­pions League knock out round an inhlangkai. Thawh­lehni zana chak lo Celtic leh Anderlecht te tan hmun a awm ve tawh lo.

Celtic Park-ah mana­ger thar Jupp Heynckes hnuaia hmalam pan mek Bayern Munich hian Kingsley Coman leh Javi Martinez te goal hmangin 2-1 in hnehna an chang. Bayern Munich hian Scottish club vawi 19 an hmachhawn tawhah chak loh an la nei lo a, tun hnai season 10 chhungin Champions League group stage an paltlang vek a ni.

Bundesliga hma­hruaitu Bayern tan hliam vangin Robert Lewan­dowski leh Thomas Muller te chhawr thei loh bakah kartawp hian an elpui Borussia Dortmund nen league match an khelh zui dawn avangin Mats Hummels, Thiago Alcantara leh Joshua Kimmich te chu bench lamah chawlhtir an ni bawk; heti chuang hian Kingsley Coman, James Rodriguez leh Arjen Robben te an la neih miau avangin hnehna chang turin buaina an nei lo.

Bayern Munich ma­nager Jupp Heynckes chuan, "Match khelh tur kan ngah a, fing taka pla­yer siksawi thiam a ngaih avangin thil a awlsam lo hle. An mualah chuan Celtic hi team ṭha tak an ni a, player langsar ṭhenkhat tel loa hnehna kan chan theih avangin a lawmawm hle," tiin a sawi.

Inkhel dangah PSG chuan an mikhual Anderlecht lakah 5-0 in hnehna an chang, left back Layvin Kurzawa-a'n hattrick a siam bakah Neymar leh Marco Verratti ten goal an khung. France international Kurzawa hi Champions League inelnaah defender zinga hattrick siam thei hmasa ber a ni - PSG player zingah pawh Zlatan Ibrahimovic hnua European match khata goal thum khung leh thei hmasa ber a ni bawk.

Kum 25 mi Kurzawa chuan, "Goal thum ka khung theihna chhan chu teammate ka neih ṭhat vang a ni, goal ka khung hian inrintawkna min pek belh sawt ṭhin a ni," a ti. PSG defender dang Thomas Meunier pawhin Belgium leh Gibraltar inkhelh ṭumin hattrick a lo siam ve tawh bawk a ni.

PSG hian an match hmasa paliah goal 17 zet an khung ta a, Manchester United-in treble champion an nih kuma record an siam tawh goal 16 chu an khum chiah bawk a ni. United-in record an siam ṭum hian match liah goal sarih an chhuah - PSG hian goal khatmah an la chhuah lo thung.