Benfica hnehtu United tan point khat a tawk

Manchester United chuan an mikhual Benfica 2-0 in an hneh a, Champions League last 16 lut turin match hnih an la hmabakah point khat hlawhchhuah bak a ngai tawh lo. Europa League champion an nih avanga Eu­rope-a club inelna sang ber kheltu United hian match li an khelh tawhah hnehna an la chang fai vek a, Benfica laka an goal hnih hi Mile Svilar-a'n an lama a tih luh leh penalty aṭanga Daley Blind khung a ni.

Red Devils boss Jose Mou­rinho chuan, "Last 16 kan la lut lo maw? Vawi li chak hi a la tawk zo lo maw? A pawi lo e, kan hmabak match hnih aṭangin point kan hlawhchhuah leh a ngai a ni mai," tiin an hmaa chona inchhawp chu hlenchhuah ngei a tum. Group A inkhel dangah CSKA Moscow chuan 2-1 in FC Basel an hneh bawk.

Inkhel chu

United tan Anthony Martial chuan mual vei lam sir aṭangin Benfica tlarhnung a rum ṭhaih fo a, minute 15-na lekah penalty a hlawh chhuak. Mahse, French forward hian Douglas-a'n a tih tluk avanga a penalty hlawhchhuah hi a pet hnuah goal-ah a chantir thei lo a, a hming chherna remchang a chhawr thei lo - Benfica goalkeeper Svilar tan hming chherna remchang a ni thung.

Kum 18 mi lek keeper hian Belgian striker Romelu Luka­ku-a hun ṭha neih chu vawi hnih zet a dan sak bawk a, mahse a vanneih a kaltluang reng bik lo. Benfica midfielder hlui Nemanja Matic-a'n a club hlui lamah shot a nei a, he shot hian post a per hnuah Matic ball pet dan tuma dive Svilar-a fuh a, goal-ah a lut. United-in hun tawp nan minute 12 chiah a awm tawh tihah penalty an hlawh chhuak a, Daley Blind-a'n a chhuih lut. Benfica hi United tlarhnung rumṭhaih lo tawp an ni bik lo. United goalkeeper David de Gea chuan vawi hnih ngawt save ropui a nei a, Spanish goalkeeper thiamna hi fak nawn a ṭul leh ṭhin.

Thil danglam

Kum 18 mi Svilar-a'n penalty a dan chiah khan Champions League inelnaa penalty dang thei naupang ber a ni a, Matic-a shot an lama a tih luh khan he inelnaa own goal nei thei naupang ber a ni nghal bawk. Manchester United tan academy naupang midfielder Scott McTominay a inlan a, Red Devils hian October 1937 hnuah first-team squad-ah match 3,883 chhung chu a zawnin an academy chhuak an telh tawh - Thawhlehni zan hian McTominay bakah an academy chhuak zingah Jesse Lingard leh Marcus Rashford an inlan bawk.

United boss Mourinho chuan, "Vawiinah khan kan aca­demy naupang McTominay kan khelhtir a, goal hnih kan khung a, goal kan chhuah lo a, point thum kan hlawh a, inhliam serious kan nei lo a, kan chak avangin pawisa tam zawk kan hlawh bawk. Ka hlim tih hian ka awmdan a hrilhfiah zo lo," a ti a, hetihrual hian Romelu Lukaku leh Ander Herrera ten penalty an inchuh chungchang sawiin, "A pet tur chu Anthony Martial a ni a, mah se penalty pahnihna kan hmuh khan ka la chhuak tawh. Daley Blind-a'n a pet ta a, ani kha pettu tura ka thlan a ni," tiin a sawi.