Thiem-a'n hnehna nen bul a ṭan

Tun season chhunga ATP Tour tournament hnuhnung Paris Masters khelh mekah seeded pangana Dominic Thiem chuan Peter Gojowczyk hnehin last 16 a inhlangkai.

Thawhlehni zan khan Austrian star Thiem hian 6-4, 6-7 (3/7), 6-4 in hnehna a chang a, Fernando Verdasco leh Kevin Anderson te in­khela chak zawk nen an inhmachhawn leh ang.

Inkhel dangah US Open semifinalist Pablo Carreno Busta chu wildcard hmanga inlan Nicolas Mahut lakah 6-4, 6-1 in a tlawm ve thung. Service nei ṭha tak Sam Querrey erawh Serbian tlangval Filip Krajinovic lakah a chak lo a, American star Querrey tan ATP Finals khelh a beiseina a tawp zui ve nghal.

Paris Masters-ah hian world number 1 Rafael Nadal pawh a inlan a, Spain tlangval hian nizan khan a match hmasa ber khelin he thu buatsaih lai hian result kan hre hman lo. Nadal a inlan lai hian a elpui Roger Federer erawh ATP Finals khel tura chawlh a duh avangin a inlan thei lo thung a ni.