Indian football buaina Delhi High Court-in Praful Patel a pawm lo

Indian football buaina-in kiam lam a pan thei lo - Thawhlehni tlai khan Delhi High Court chuan All India Football Federation president Praful Patel chu National Sports Code bawhchhiaa inthlannaa tlingah a puang a, Indian football a thuneitu sang ber AIFF chu thla nga chhunga inthlang thar turin a hriattir.

Sports activist leh dan hre mi Rahul Mehra chuan nikum khan AIFF lakah hian Public Interest Litigation (PIL) a thehlut a, Delhi High Court chuan uluk taka a ngaihtuah hnuah AIFF inthlanna chu dan bawhchhe chunga kalpui a nih ngei thu a puang ta a ni.

Buaina chu

December 2016 khan AIFF hian hruaitu an thlang a, Praful Patel bakah vice president panga leh executive committee member tur mi 10 chhawpchhuah an ni.

Praful Patel thlan tlin a nih bakah mi dang zawng hi chuhtu awm loin an tling vek a, mah se hei hi Delhi High Court chuan dan bawhchhiaa inthlannaah a puang a ni.

Court-a AIFF khingtu Rahul Mehra chuan, "Praful Patel hian dik lo takin inthlan a hmachhawn a, dan bawhchhe chungin Indian FA president-ah hian thlan tlin a ni. AIFF hian FIFA hnuaiah dik taka an kal thu leh National Sports Code hnuaia an kun loh thu an sawi a, mah se an insawifiahna hi court chuan thu tlingah a ngaihsak lo a ni," a ti.

Engvang maw?

'AIFF chuan engtiang takin nge National Sports Code chu a bawhchhiat?' tih chu zawhna a ni.

Rahul Mehra chuan, "Court hmaah khan he inthlanna hi lemchanna mai a nih thu ka sawi. Zalen taka inthlanna hi neih a ni lo a, AIFF lama thuneitu leh thiltithei deuhte chuan executive member leh state association-a member-te chu mail an thawn vek a, AIFF hruaitu atana an thlan turte an hrilh vek a ni," a ti.

December 2016-a AIFF Annual General Meeting-a Praful Patel thlan a nih khan a zawna ṭum thum Indian FA president a nihna a ni a, kum 2008 khan he dinhmun hi a chelh ṭan. Praful Patel hi Indian parliament-ah member a ni a, Civil Aviation & Heavy Industries-ah minister dinhmun hial a lo chelh tawh bawk.

Thutlukna tlai

Hlawhtling taka AIFF khingtu Rahul Mehra hi Aam Aadmi Party dintu zinga mi a ni a, infiamna huang chhunga inthlanna dik lo leh eir­ukna awm chungchang a bei ṭhin a, Indian FA hma hian Suresh Kalmadi (athletics) leh VK Malhotra (archery) te chu eirukna chungchang avangin hlawhtling takin a lo khing tawh bawk.

Rahul Mehra chuan, "April leh May thla bawr vel khan Court lam chuan thutlukna an siam fel tawh. Mahse, India-in FIFA U17 World Cup kan thlen dawn avangin thu­tlukna chu pawt khawtlai hrih turin ka ngen a, World Cup zawh hma chu thutlukna puan a ni ta rih lo a ni," a ti a, thubuai ngaihtuah a nih lai hian AIFF chuan an committee peng pakhata tel tura an sawm thu leh a hnar thu a sawi bawk.

FIFA hremna?

Delhi High Court-in dik lo taka AIFF inthlanna neih a nih thu an puang a, hemi ruala zawhna awm nghal chu FIFA-in engtinnge AIFF hi a en ang, tih a ni.

AIFF senior vice president Subrata Dutta chuan, "FIFA hian kum tinin FA pahnih emaw pathum bawr vel hi chu a hrem ziah a, chung a hrem zingah chuan kan tel ve ang tih a hlauhawm hle. He kan buaina chungchang hi FIFA nen kan sawi ho thuai ang. AFC dan leh National Sports Code zawm kawpa kal hi a harsa em em a ni," tiin a sawi.

Hetihlai hian India rama cricket thuneitu sang ber BCCI leh AIFF-a an legal advisor lo ni tawh Usha Nath Banerjee chuan, "Engmah hlauhthawn tur a awm lo. Tuna buaina hi chu FIFA dan nena buaina a awm lo a, chhungkuaa chinfel mai theih thil a ni," a ti a, a hlauthawng lo.

AIFF Chhanna

Court-in thla nga chhunga in­thlang ṭha turin AIFF a hriattir a, hei mai bakah hian Indian FA dan leh hrai chu National Sports Code nena inzula siamṭha turin an ti bawk. Court chuan Chief Election Commissioner of India hlui Dr SY Quraishi chu AIFF insiamṭhatna kawnga administrator turin an ti a, mah se Indian FA hian chuti maia phi buai an tum lo.

AIFF chuan thuchhuah siamin, "December 20, 2016-a inthlan neih a nih hma khan court hian AIFF chu national sports code zula inthlanna nei turin a lo hriattir tawh a, AIFF chuan court duh ang ngeia engkim kalpui a nih thu leh, sporst code, AFC leh FIFA dan hnuaiah engkim kalpui a nih tur thu hriattirin inthlanna kha neih a ni. Ministry of Youth Affairs and Sports pawhin AIFF inthlan hi min hriatpui thlap ṭhin a, tuna Delhi High Court thuchhuakah hian hlauhthawnna tur kan nei lo. High Court thuchhuak hi lehkhaa kan dawn hun hunah hmalak dan tur kan ruahman nghal dawn a ni," an ti.

Delhi High Court thutlukna hi Supreme Court lamah an khing dawn niin thu kan dawng.